نزعة الفردانية مقابل الطابع الجماعي

::Photo credit goes to its owner::

- " إميل دوركايم” لما جه يدرس ظاهرة الإنتحار و يحللها لقى إن الإنتحار موجود في بلاد أوروبية فيها رخاء إقتصادى و دا شيء عكس توقعه 

.

و لكنه لقى إن في عامل مشترك بين البلاد دي و هو ميل شعوبها للنزعة الفردانية individualistic  في التفكير، بمعنى إن الفرد هو المحور و مصالحه هي الأهم من مصالح الجماعة.

الجماعة في المجتمعات دي بيبقى دورها أقل في حياة الأفراد و بيبقى كل شخص مسئول مسئولية كاملة عن سلوكه و نتايج سلوكه، يعني مفيش قيود مجتمعية هتمنعك من أى سلوك و أى نجاح أو فشل هيتنسب ليك ف النهاية، و دا شيء مرعب للفرد و بيصيبه بقلق anxiety رهيب و خوف من الحياة و المستقبل بيدفعه للإنتحار للتخلص من الهلع دا. 

بعكس المجتمعات ذات الطابع الجماعي collectivism اللي بيسير فيها الفرد وفق معايير حطها المجتمع و خيارات متفق عليها من أفراد المجتمع، و يقدر الفرد ساعتها يشعر بالأمان لأنه مش مسئول عن كل خياراته في الحياة ومحاسب عليها، وإنه ضامن دعم مجتمعى له في حالة فشله في خياراته دي ف مش هيتحمل الفشل لوحده 

.

- قرار المسئولية الكاملة عن خياراتك و الإنحلال التام عن النمط السائد هو قرار في منتهى الصعوبة لأي شخص و بيحتاج لعوامل كتيرة لازم تبقى متاحة للفرد عشان يقدر ياخده، لذلك ف الناس اللي بتضحى بخيارات شخصية عشان ضغوطات مجتمعية ناس مش سيئة بقدر ما هما ناس معندهومش الإمكانية الحالية للإختيار دا،

في ناس بترفض تستمر في جوازة بيتمناها بسبب ضغوط الأهل لأنه ببساطة ف الحالة دى لو فشل محدش هيدعمه زي ما لو فشل في جوازه مجتمعه كان مباركها، و قيس على الموضوع دا خيارات زي الشغل اللي هتشتغله، و أسلوب حياتك عموماً و باقي القرارات.

- قرار الخروج على النمط السائد عموماً بيحتاج من الفرد قوة كافية تكفيه عشان يعوض العائد اللي المجتمع كان بيقدمهوله، ولو مش معاه القوة دي، ف قراره دا تقريباً انتحار.

البوست الأصلي على الفيسبوك

https://www.facebook.com/2010.hamed.ahmed.hamed/posts/1736435276409733

#cycle #hamed_ahmed

#سيكل #حامد_أحمد

مُعضلة الدين والدنيا

::Photo credit goes to its owner::

- تعريف حسن البنا للإسلام إنه دين و دولة و علم و جهاد و أخلاق و ثقافة وحاجات كتير كدا مع بعضها، كان له أثر وانتشار رهيب ف الوعى العام أكثر من كل كتب السلفيين و مجهوداتهم السابقة و الجاية، و لذلك عاوز اتكلم عنه سريعاً.

- التعريف اللي فوق دا و إن كان يبدو عليه رومانسي و شاعرى جداً عند بعض الناس إلا إنه - في رأيي- بيعكس حالة من الفوضى و اللانظام فى المكان اللي نشأ فيه وبيعكس مجتمع فوضوى مش قادر يحط تعريف منظم لأي شيء جواه.

تعريف زي اللي فوق دا بيضع «شيء» اللي هو الدين محل «كل شيء» اللي هو الدولة - سياسة يعني - و العلم و الأخلاق و الثقافة و غيره، و بيطبع على العارفين بيه «الفقهاء و المشايخ » صفة القداسة و العلم الكلي الشامل...

و بيدي ليهم سلطة مطلقة تتدخل في كل مجالات الحياة، و دا ببساطة لا يعكس شمولية الدين الإسلامي على كل المجالات ف حياتنا و لا حاجة لأن كل الديانات مرت بنفس المرحلة مع شعوبها و أشهر مثال هو الكنيسة الكاثوليكية في أوروبا.

 و لكن دا بيعكس انهزام كامل لدينا في كل المجالات دي و فراغ اضطرينا نحط الدين عشان يملاهم كلهم، و بالضرورة غياب كوادر في كل المجالات دى قفز الفقهاء بكل ثقة عشان يملوا مكانهم.

و ظهور التعريف دا في زمن الإخوان له سبب هام من وجهة نظري و هو حالة الفوضى السياسية اللي تزامنت مع ظهور الإخوان و حالة المركزية السلطوية عندنا اللي بتحط السلطة في ايد شخص واحد بلا أي إحترام للتخصص، و كان مشروع الإخوان دايماً زي مشروع ثورة يوليو زي مشروع الملكية هو ببساطة نقل السلطة المطلقة الشاملة من حد لحد وخلاص.

-  في رأيي إن أى محاولات للتنوير - مع تحفظى ع الكلمة و مستخدميها - مش هتتم إلا بظهور بدايل في كل المجالات تغطى العجز اللي بيحاول الدين يغطيه لحد ما اتهربد من كتر التشتيت و الحرب على كل جانب، و لما تظهر البدايل العلمية و الفلسفية و الثقافية و الأخلاقية هيعاد تعريف الدين مرة آخرى تعريف أفضل يفضل له مكانة محددة بسلطات معينة تضمن له الإستمرار و تضمن للمجتمع رفاهية الإستفادة من وجوده. 

أرشح أى كتب عن المعتزلة
و أرشح كتاب أساطير الآخرين
أرشح متابعة سلسلة #أفخاخ_الإسلاميين لمولانا Hany Emara

البوست الأصلي على الفيسبوك

https://www.facebook.com/2010.hamed.ahmed.hamed/posts/1739119406141320

#cycle #hamed_ahmed

#سيكل #حامد_أحمد #

خوف وقلق

::Photo credit goes to its owner::

- لما نيجى نحاول نشوف السبب الأساسي ورا أغلب سلوكياتنا الغريبة و الغير منطقية و اللي فى بعض الأحيان مؤذية abusive اللي بنعملها سواء لنفسنا أو لغيرنا هنلاقي إنها نابعة من قلق anxiety أو خوف fear تجاه شيء ما 

.

يعني كمثال عالمي عند الجميع، ف الخوف من الموت و غموض ما بعد الموت هو من أقوى المؤثرات في تكوين نفسية الـ Homo sapiens اللي هما إحنا بصفة عامة و تكوين تصوراتنا الميتافيزيقية كلها عن الآخرة و الآلهة و غيره 

.

كذلك الخوف من الوحدة fear of solitude هو محرك أساسي لميول البشر لتكوين علاقات و روابط إجتماعية مع بعض.

من أشهر أنواع القلق اللي بيؤثر في سلوكياتنا هو القلق من الانفصال separation anxiety، و هنا أنا مش بتكلم عن الاضطراب اللي مكتوب في كتب الطب النفسى اللي هو  SAD، و لكن بتكلم عن القلق الموجود بشكل طبيعي فينا من الفراق و الانفصال عن الناس اللي بينا و بينهم روابط عاطفية قوية.

في رأيي إن الشخصيات المرتبطة بزيادة أو اللي ممكن نقول عليه لزقة clingy هو شخص بيعاني بصورة ما من قلق الإنفصال دا و بيحاول يتأقلم مع قلقه دا بأنه يوثق ارتباطه بالطرف التاني بصورة قوية جداً، فيلزق فيه و يحيط بيه من كل جانب و يطلب منه إثباتات كتيرة جداً إنه مش هيسيبه و يمشي.

النوع دا من القلق ممكن ميكونش موجود في بعض الناس و لكن بيظهر فيهم بسبب ظروف معينة اتحطوا فيها زي:

1 . العلاقات عن بعد long distance relationship و دا لأن الطرفين اللي ف العلاقة مش شايفين بعض و دا بيحفز عند كل واحد فيهم من إن الطرف التاني ممكن يمشي ف أي لحظة.

2. او قلة حب طرف لنفسه low self esteem و دا بسبب ظروف مر بيها خلته عنده قناعة معينة إن أي حد مرتبط بيه بالضرورة هيسيبه.

التوتر الناتج عن القلق دا ممكن في بداية علاقات الناس ببعضها يتم ترجمته ك حب زايد، أو غيرة لذيذة، أو صحوبية و لكن بعد فترة بيُستهلك الطرفين و بينهي العلاقة بشكل منهك للجميع.

أرشح القراية عن
Terror management theory
Anxiety disorders

البوست الأصلي على الفيسبوك

https://www.facebook.com/2010.hamed.ahmed.hamed/posts/1743929878993606 

#cycle #hamed_ahmed #self_awareness

#سيكل #حامد_أحمد #وعي_بالذات