كيف تؤثث بيتك بأقل تكلفة

::Photo credit goes to its owner::

إزاي تفرش بيتك بأقل تكلفة .. ده مقال كنت كتباه من فترة وحبيت أشاركه معاكم نظرا لأن أعرف ناس كتير بتجهز بيتها حاليا.

هشاركم شوية نصائح وأفكار .. وأي حد عنده تجربة في الموضوع يشاركنا في الكومنتات <3

1. الأثاث المستخدم في حالة جيدة ..

أثاث مستعمل أو مستخدم .. الفكرة ممكن تكون صادمة لبعض الناس وخاصة لو كانوا عرايس جداد .. وده راجع لمفهوم خاطئ أن الأناقة والفخامة والشياكة مبيتحققوش إلا بأثاث جديد ومكلف، على الرغم من وجود استايلات بتعتمد في أساسها على قطع أثاث قديمة زي "الفنتاج"

نظرا للظروف الإقتصادية بدأت تظهر صفحات وجروبات لتبادل قطع الأثاث أو بيعه، ولو أنت بتجهز بيتك في بداية حياتك هتلاقي كل المستويات بداية من قطع الأثاث اللي استخدمت أيام وشهور لسنين ..

2. الجمال أم الجودة ..

دائما بنقع في مشكلة الاختيار بين أثاث شيك وفخم بس مش عملي، أو أثاث عملي وبسيط وبيفقد الجانب الجمالي ..

ولكن لو غيرنا طريقة تفكيرنا وبدأن نختار بميزان .. أن لكل قطعة في بيتنا لازم يكون ليها استخدام حتى لو ديكوري هنحل أزمة اقتناء أشياء ملهاش استخدام أصلا ومكلفة وثمنها كبير جدا ..

3. التبسيطية ..

أكثر الاستايلات اللي بتقدم لك نماذج أثاث بسيطة وتكلفتها مش كبيرة أو على الأقل تكلفة في محلها هو التبسيطية أو المينماليزم ..

وده اتجاه كبير وواسع مش بس بيشمل الديكور وإنما في نمط حياة كامل اسمه "المينماليزم" وانصحكم بالقراءة عنه .. وأنا كنت نزلت بوست قبل كده عنه هحط لينك بتاعه في الكومنتات ..

4. أفكار خارج الصندوق ..

الخروج عن النمطية عموما هو طريقك للتوفير في الميزانية ،

فبدلا عن غرفة نوم مكون مثلا من سرير ضخم ودولاب ضخم وتسريحة كبيرة وشيزلونج أو فوتيه واتنين كومودينو .. هتلاقي أفكار كتير جدا تخرج بيه عن النمطية دي في تصميم غرفة النوم وهتوفر عليك كتير وكمان هتديك نتيجة أفضل ..

5. البحث والتخطيط ..

أغلب اللي أعرفهم بيفرشوا بيتهم ماشيين بدون خطة او ميزانية محددة .. يعني مفيش حد أدنى أو حد أقصى مثلا ، الاحتياجات والأولويات .. حلول بديلة ..

كل ده هيوفر عليك شراء حاجات ملهاش لازمة نهائيا .. بالاضافة أنه هيخلق ليك طول الوقت أفكار وحلول هتفيدك وهتسرع عليك خطواتك في فرش بيتك ..

6. اصنع بنفسك ..

فيديوهات اصنع بنفسك و DIY مالية اليوتيوب والفيس بوك .. وعندي ناس كتير على الفيس بيعملوا حاجات حلوة جدا في بيتهم بالأسلوب ده .. واستخدامات لا تخطر ع بالك .. وهحط لينكات لقنوات متخصصة في المجال ده ع اليوتيوب ..

7. إعادة التدوير ..

بعيدا عن حماية البيئة وحفظ الموارد .. إعادة التدوير بيوفر عليك كتير جدا في ميزانيتك .. من أول الورق والكراتين والصناديق الخشبية والملابس القديمة لحد قطع الأثاث اللي استهلكت ..

8. أثاث ذكي متعدد الاستخدامات ..

وهو بيكون تكلفته أكبر من الأثاث العادي ولكن مقارنة مع قطع الأثاث اللي بيتم دمجها في قطعة واحدة هيكون هو الاختيار الأفضل للتوفير ..

9. اشتري اللي انت محتاجه وبس ..

بستغرب جدا من الناس اللي بتجيب أوضة أطفال ومفارش أوضة اطفال وحاجات غريبة جدا بدون داعي وهما أصلا عرسان جداد .. و20 فوطة و20 ملاية وأرقام مبالغ فيها .. وأصبح الأمر فيه تنافس كبيرة ..

ولكن لو بتدور توفر في تكلفة فرش بيتك .. فالإقتصاد في عدد القطع اللي بتشتريها وشراء اللي لازمك بس في بداية حياتك هو الحل ..

10. بلاش نيش وبلاش دولاب مليان حاجات مش بنستخدمها .. بلاش شقق كبيرة .. بلاش براقع و3 طبقات ستاير .. بلا معرض البلاستيكات وطقم الصيني المكون من 500 قطعة .. بلاش كل أنواع الكاسات وأحجامها وألوانها .. واخيرا بلاش ترمي كل حاجة قديمة من غير ما تقيس احتياجك ليها وحساب بديلها هيتكلف قد ايه ..

الصورة ليست من تصميمي الخاص .. ولاي استفسار ممكن تتواصل معايا ..

وصلات مساعدة:

السوق المفتوح

https://eg.opensooq.com/en/furniture-decoration/furniture

مقدمة عن الحياة البسيطة

https://www.facebook.com/aya.maneer.9/posts/588542118157729

5 DIY Rustic Furniture Ideas

https://www.youtube.com/watch?v=YCR9Y8nz-z0

البوست الأصلي على الفيسبوك:

https://www.facebook.com/aya.maneer.9/posts/622474924764448

#Decoration
#furnish_you_home
#Continued

غرف نوم الأطفال

::Photo credit goes to its owner::

غرفة الأطفال مش بس ألوان ورسومات كارتون .. غرفة طفلك هي عالمه الخاص اللي بيخلقه بأحلامه وامكانياته وطاقته ومهارات ..

فبالتالي من أهم المعايير اللي لازم تكون في اعتبارنا عند تصميم غرفة الأطفال هي ما يحتاجه طفلك وتستطيع تنفيذه أنت ..

دورت على أكثر 8 عناصر من المهم والمفيد أنها تكون موجودة داخل تصميم غرفة الأطفال .. وسهلة تنفيذها وغير مكلفة وأثرها ايجابي في تربية طفلك 

1.        لوحة من داخل أحلامه ..
ممكن بدلا عن رسومات الكارتون المكررة والمملة بعد فترة أن تفتح المجال لطفلك لرسم لوحة بنفسه وتحويلها لحائط بالكامل من تصميمه ..

2.       بساطة الأفكار وتصميم الأثاث ..
مهم جدا تختار تصميمات ذكية وبسيطة وغير معقدة بدون زوايا حادة وارتفاعها مناسب لطفلك عشان تحميه من أي اصابات .. وعشان تستغل مساحة الغرفة بتاعته بشكل يسمح لخلق أماكن أخرى للعب والحركة .. بدلا عن السراير الضخمة والمعقدة واللي بتستهلك المساحة المتاحة ..

3.       لوحة انجازاته الصغيرة ..
متنساش تحتفي بانجازاته وذكرياته اللي بتتكون معاه واللي يحب هو يحتفظ بيها ..

4.       مساحة ألعاب مناسبة للتعلم ..
مهم تصميم مساحة اللعب لطفلك بشكل يسمح للتعلم وقضاء أوقات طويلة في تنمية مهاراته واستغلال عناصر اللعب بشكل مفيد ..

5.       اسمح له يمارس مواهبه ..
حيطة السبورة أو اللوحة سهلة القطع دي من أفضل وأسهل وأرخص الأفكار اللي بتسمح لطفلك بممارسة مواهبه بدون خساير كبيرة وبشكل صحي ..

6.       تصميم يناسب ذوقه الخاص ..
لو بنت بتحب التفصيل من صغر سنها ممكن توفر لها ركن خاص بده، وغيرها من الاهتمامات اللي بتظهر في سن الطفولة ويمكن استيعابها وتطويرها ..

7.       لكل شئ مكانه الخاص ..
تصميم يسمح لطفلك تعلم النظام وأن لكل شئ مكانه وبسهولة يقدر يعمل ده هو من أهم الأفكار اللي لازم تهتم بيها وأنت بتصمم غرفة طفلك ..

8.       استيعاب قدراته وتنمية مهاراته واستغلال طاقته ..

حائط التسلق والعُقلة أو ممكن استغلال حوائط في الغرفة للتعلم بشكل مرح دي أفكار سهلة التنفيذ ومهمة وغير مكلفة أبدا .. وبتساعد الطفل على تفريغ طاقة الحركة أو الاكتشاف 

ومننساش التهوية والإضاءة واستخدام دهانات صحية وسجاد من نوع خاص يحمي طفلك من الصدمات أثناء الجري، وخامات من المفارش والأغطية لا تسبب الحساسية ..

البوست الأصلي على الفيسبوك: لرؤية كامل الصور

https://www.facebook.com/aya.maneer.9/posts/732654840413122

#your_kids_room_design_tips
#Decoration
#furnish_your_home
#Continued

ربط الديكور بعلم النفس

::Photo credit goes to its owner::

بقالي فترة بحاول أربط بين مجال درسته وهو العمارة والديكور ومجال حبيته وهو علم النفس.. 

احنا درسنا في الكلية أنه العمارة لها تأثير على كل جوانب الحياة وبالتأكيد الصحة النفسية جانب مهم .. 

حاولت أدور على حاجات مبسطة نقدر كلنا بأقل الامكانيات نعملها تساعدنا خلال تصميم بيتنا نعيش حياة نفسية أفضل وتساعدنا كمان نتعافى من بعض الأمراض ..

وأول الحاجات اللي هنزلها تخص الاكتئاب .. وإزاي ممكن التصميم الداخلي للبيت يساعد على التعافي من الاكتئاب ؟!
هنشرح شوية عوامل بسيطة نقدر من خلالها نحول البيت لمساحة صحية ..

1. الضوء "الإضاءة"
الإضاءة الطبيعية المباشرة يحسن المزاج ويجدد الطاقة، مساحات الفتحات اللي بتدخل شمس وضوء طبيعي يوميا في البيت بيساعد على تغيير المود داخل البيت، وبيساعد على التخلص من المشاعر السلبية .. بالاضافة كمان للتهوية الجيدة ..

 
استخدام ألوان بتساعد على انتشار الإضاءة داخل البيت زي الأبيض ودرجاته، وهنعرف أكتر في بوست تاني عن علم chromotherapy..

2. الخطوط الواضحة والمساحات المفتوحة والمساحة ذات الأشكال الهندسية المنتظمة وبدون زوايا حادة بارزة أو غاطسة .. بدون تعقيدات زي اللي بنشوفها حاليا جوة البيوت المصرية في الأسقف المعلقة والجدران، وزي ما اتكلمنا قبل كده عن المينيماليزم وتقليص الموارد والمواد المستخدمة، بيساعدك على أنك تحافظ على بيتك بدون كراكيب ومرتب دايما وده هيساعد بدوره برده في الحفاظ على راحتك النفسية .. 

 
بعض الأمراض والاضطرابات النفسية بيكون صعب على اللي بيعانوا منها أنهم يطبقوا نظام زي المينماليزم زي اضطراب ما بعد الصدمة أو القلق، ولكن فيه طرق بتساعدهم على خلق "لايف استايل" محدد هنشرحه في بوستات تانية ..

3. الألوان ..
تتفاعل الألوان معانا وتغير من حالتنا النفسية وشرحت ده قبل كده في بوست عن الألوان وتأثيراتهم علينا، كمان اضطرابات زي الاضطراب الموسمي العاطفي ممكن تخفيفه عن طريق التعرض لإضاءة تشبه الشمس في اللون والحرارة..

 
بعض الدراسات أثبتت أن درجات الأخضر الترابية والأزرق الأرجواني والأبيض بدرجاته يساعد على التعافي من بعض أعراض الاكتئاب، كمان الإضاءة البيضاء والزرقاء تناسب أكتر الفراغات الخاصة بمرضى الاكتئاب ..

4. الطبيعة والنباتات..
اختيار نباتات متحتاجش عناية بشكل مستمر ولكن بدورها تضيف اللون الأخضر المستوحى من قلب الطبيعة ينعكس بالتأكيد على الحالة النفسية لمريض الاكتئاب ولكن مهم ننتبه من نقطة العناية دي ونراعي صعوبة بذل مجهود في ده ..

5. الأثاث ..
الاستغناء عن الأثاث غير المستخدم واختيار قطع مميزة وتدي انطباع بالخصوصية وتلبي الاحتياجات، زي أنه ممكن مريض الاكتئاب يحتاج لمساحة خاصة باليوجا أو تمارين خاصة بنوفرله ده أو قطعة للفطار أو اللابتوب على السرير، بنقلل من المرايات والذهبيات والاكسسوارات الحادة واللي بتشتت الانتباه واختيار كمان وحدات سهلة التنظيف ..

البوست الأصلي على الفيسبوك:

https://www.facebook.com/photo.php?fbid=722441001434506

#Decoration
#furnish_your_home
#Continued