مقالـة الاء الجنـدي
كان في مجموعة من الناس، اتحبسوا في منطقة جبلية زمان ومقدروش يخرجوا منها ويرجعوا لبلدهم تاني، رضيوا بالأمر الواقع وكوّنوا مدينة في المكان دا، بس للأسف لاحظوا إن كل الأطفال أول ما بيتولدوا بيجيلهم مرض في عينيهم بسببلهم العمى، بعد مرور أجيال كتير أصبح كل سكان البلد دي عميان مبيشوفوش، ومكانوش يعرفوا حتى إن أجداد أجداد أجدادهم كان عندهم حاسة إسمها حاسة البصر، وجفون عيونهم اتقفلت.
بطل القصة بتاعتنا تاه، ووصل للبلد دي، لاحظ إنهم عميان، بدأ يكلمهم عن البصر وهوا شايف إيه وجمال الحياة ال مش شايفينه، كدبوه، واتهموه بالجنون، واعتبروه خارج عليهم، وحاربوه، ولما اضطر يهاودهم في كلامهم عشان ياكل ويشرب احتقروه، واعتبروه خادم، واعتبروه في قاع الهرم الاجتماعي بتاعهم، لما حب بنت من البلد، واتقدم عشان يتجوزها، كلهم اعترضوا لأنه أقل منهم “لأنه بيشوف وعنده عيون”، بصره كان بيقلل منه، كان بالنسبالهم العين دي هي اللي بتسبب أي تصرف خاطيء بيعمله، اشتغل غلط؟ بسبب عينيه. سرق؟ بسبب عينيه. اتعصب على طفل وضربه؟ بسبب عينيه، بعد جدل كبير وافقوا إنه يتجوز بنت البلد اللي حبها، بشرط واحد، إنهم يشيلوا عنيه، يخلصوه منها، لأنها بالنسبالهم هي ال بتدفعه يعمل كل حاجة غلط، وبسببها احتقروه واعتبروه عرضة لارتكاب أي جريمة، أما من غيرها هيكون راقي وعنده خُلُق زيهم، موافقش وهرب.
الإنسان اتخلق عنده قلب، مخ، أيدين، كبد، رجلين، أنف، فم، عيون وأعضاء تانية كتير، كل عضو تم خلقه لوظيفة معينة يؤديها، هل عشان مسرقش أول ما اتولد أهلي المفروض يقطعوا إيدي؟ هل عشان مشوفش حاجة مُشينة أهلي المفروض يشيلوا عنيا أول ما اتولد؟ هل عشان مسمعش شيء غير أخلاقي أهلي المفروض يقطعوا ودني أول ما اتولد؟ هل عشان ماكلش بشراهة أهلي المفروض يستأصلوا معدتي أول ما أتولد؟
طيب، هل عشان البنت تكون عفيفة وأخلاقها كويسة ومتنساقش لرغباتها الجنسية بطريقة غير أخلاقية أهلها يقطعوا جهازها التناسلي أول ما تتولد؟
آه، منظمة الصحة العالمية سنة 2003: نسبة الستات المتجوزة اللي تم تختينها في مصر 94.6%، والأسوأ من كدا،
69.1% من الستات دي قالوا إنهم هيعملوا عملية الختان لبناتهم أو عملوها بالفعل.
أنا مش هتكلم عن أسباب الختان، ولا أنواعه اللي بتوصل للحرق بمواد كاوية، ولا عن دوافعه اللي كلها بتوصلنا لنفس النقطة وهي الحفاظ على عفة البنت، أكتر ما يهمني أي حد يعرفه هوا أضرار الختان، أتمنى فعلاً أي حد يعرفها عشان يقدر يتكلم بحجة قوية مع أي حد لسه مؤمن إن الختان مش جريمة وبيقول بكل بجاحة إنه هيختن بناته.
نقدر نتكلم عن أهم الأضرار في 4 نقط:
1/ الألم: الألم إما بيكون وقت العملية نفسها ألم شديد جداً بسبب استخدام جرعات مخدر مش مظبوطة أو عدم استخدام مُخدر أصلاً- نسبة كبيرة من العمليات مبتتمش بدكاترة متخصصين وبيعملها حلاقين أو دايات- ممكن الألم دا يوصل لصدمة عصبية بتؤدي للوفاة لو كان ألم شديد جداً.
أو ألم مزمن وحطوا تحت كلمة مزمن مية خط، سواء أثناء ممارسة العلاقة بعد كدا أو أثناء التبول.
2- النزيف: بيحصل أثناء العملية في حالات كتير من حالات الوفاة ال بنسمع عنها، لو متلحقش -ودا غالباً- دم الجسم بيتصفى، بتدخل البنت في صدمة وبتموت.
3- العدوى: العدوى ممكن تحصل في مكان العملية نفسها وتسبب التهاب مزمن للمكان دا يسبب الحكة والألم والإفرازات الغير طبيعية،
أو تدخل الجسم نفسه في مجرى البول وتسبب التهابات في الحالب، او المثانة، وبعض الحالات بتوصل للكى وبتؤدي فعلاُ لفشل كلوى، أو تسمم بالدم وممكن توصل للوفاة،
أو تدخل الجسم في الجهاز التناسلي الداخلي المبيضين والرحم وقنوات فالوب وتسبب فيهم التهابات سيئة جداً ممكن في حالات خطيرة تؤدي لاستئصالهم والإصابة بالعقم.
والأسوأ إن في أشخاص بيعملوا العمليات دي، وخاصة في جنوب أفريقيا وجنوب مصر، بيعملوا العملية بمشرط واحد لعشر بنات مثلاً، فلو واحدة منهم سبق وحصلها عدوى بمرض بيتنقل عن طريق الدم زي فيرس سي أو الإيدز فشكراً كدا اتنقل لباقي ال9،
تخيلوا لو المرض ال اتنقل دا هو الإيدز مثلاً، ييجوا أهل البنت ال اتنقلها عدوى الإيدز يقولولها انطقي انتي جالك الإيدز دا منين؟ هوا مطمرش فيكي الختان الـ عملناهولك؟
4- مراحل حياة البنت، الدورة الشهرية/ تراكم دم الدورة الشهرية داخل الجسم وممكن يسبب التهابات خطيرة جداً ومنهم بيعانوا من انقطاعها أو لخبطتها،
الزواج/ البرود الجنسي و شد أعصاب وعضلات الجسم باستمرار بدون راحة بسبب عدم قدرة الستات ال حصلهم ختان على الوصول لمرحلة الراحة بعد الـorgasm و آلام الضهر والرجل والركبة المزمنة لنفس السبب،
مرحلة الحمل والولادة/ عضلات المهبل لو اتضرت في الختان وخاصة لو النوع التالت منه بيكون صعب جداً إنها تتمدد أثناء الولادة وبيزود إحتمالية الولادات المتعسرة.
دا غير الأذى النفسي اللي بتتعرض ليه الست المُخَتّنة من أول ما يكون عندها 11 سنة لحد ما تشيخ، سواء بسب صدمة العملية نفسها أو الآثار المترتبة عليها اللي بتأثر على حياتها الزوجية والاجتماعية والنفسية بصورة كبيرة جداً.
* القصة اللي في البداية هي القصة العالمية بلد العميان للكاتب موريس ماترلينك.
لمعرفة أخبار الورشة ومواعيدها، يرجى زيارة الوصلة بالأسفل:
البوست الأصلي على الفيسبوك:
#alaa_elgendy
#PTSD
#كرب_مابعد_الصدمة
#تدوينة_كل_يوم
#ختان
#FGM
