مع ورشة السيناريست – إسلام بلال

كتير بيحثوا عن كورسات في السينما، ولكن مش عارفين يروحوا فين .. أنا هقدم لكم تجاربي الشخصية بحيث تسهل عليكم الأمور

الحمدلله، ربنا قدرني إني أكون ضمن ورشة السيناريست “إسلام بلال" لتعلم أصول السيناريو والتي تُقام في القاهرة بمركز ألوان 

كنت حابه أني أنضم للورشة دي، بعيدًا عن كونها مُدعمة، فدا حلو لينا كمشتركين في ظل الأوضاع الإقتصادية الصعبة في مصر

وإني حابة أتعلم إزاي أصنع سيناريو إحترافي، علشان أبقى متأكدة أن النقطة دي بقت قوية عندي، بحيث أقدر أطلع بيها أفكاري وأحكي عن الناس زي ما بتمنى (^0^)

ولكن الأهم، هي فكرة التطوع وبذل الجهد بدون مقابل مادي .. أنا بحمل درجة عالية من التقدير والإحترام للأشخاص اللى بتقدم العمل التطوعي عمومًا، لإني جربته بنفسي وعارفة قد إيه هو حاجة تدفي القلب .. حاجة منزوع عنها التربح، التفاخر.. بل هي حاجة بتُعطى من القلب فتصل للقلب مباشرة .

كل جهد المبذول فيها بيكون فخر ليا وإعتزاز للشخص اللى بيتعب معانا من أجل نقل “الحياة”، والخبرة لينا

الخبرة اللى بتمر بين تفاصيل البني أدم بتوصل أغلى مما نتخيل، لإنها حملت كل المشاعر الممكنة، كل الأحلام، كل الإحباطات اللى مر بيها، كل السهر والفرحة والإنتصارات

والسبب الثاني: هو السيناريست “إسلام”، رغم أني أول مرة أقابله بشكل شخصي .. إلا أن البوست اللى نشره على الفيسبوك وقت الإعلان عن الورشة حسسني أنه الإنسان مهتم … ودا تأكد ليا خلال interview بيني وبينه وقت الإختيار بين المتقدمين مين هيكمل معاه في الورشة

كان إنترفيو لطيف، وكان “إسلام” شخص ذوق، وودود، ومرح .. قضى على رهبة فكرة إني في إنترفيو .. وكان الكلام عن الأفلام والسينما متعة… وفرحت جدا لدرجة الإنشكاح أن الأبلكيشن بتاعي لفت النظر ليا، وإنهم شافوا أني أستحق أحضر الورشة، بل كلموني عن القصة الصغيورة اللى كتبتها .. فخرجت من اللقاء طايرة من كتر السعادة.

ومن أول أسبوع في الورشة .. “إسلام” بيبذل كل جهده معانا علشان ينقل خبرة سنين في المجال السينمائي والفني لينا، فمتخيلة قد إيه الموضوع صعب

وزي ما توقعت الورشة مش هتكون زي أي ورشة تانية .. فيها إحنا بنتكلم كتير أوي معاه، لدرجة أن ساعات مش بنصدق أن الوقت بيجري كدا مننا، بنسأله عن كل حاجة، وهو مش بيبخل علينا في أي إجابة .. والمتعة الحقيقية بتحصل لما بنتبادل وجهات النظر، وألاف الأفلام بيذكر اسماءها وأفكارها وسط كلامنا .. وبحس أن العالم حوالينا كبير أوي وشاسع ومهما أتفرجنا على أفلام،  وعرفنا قصص هنفضل برده محتاجين نشوف تاني وأكتر .. ونسمع بعض ووجهات النظر المختلفة بإختلاف شخصياتنا.

وفكرة أننا نتفرج على أفلام قصيرة في كل حصة، كان حاجة حبتها جدا .. فأنا بقى عندي إدمان للأفلام القصيرة من سنتين كدا، بقيت بحب أتفرج عليها أكتر علشان كل حاجة فيها مختلفة تمامًا عن الأفلام المنتجة من شركات كبيرة، ومعدات وقصص وسيناريوهات بتتغير على حسب المخرج والمنتج والممثل وأي حد معدي أدلى بدلوه في الحكاية.. فهي الأقرب للقصة المكتوبة بالفعل ودا هيدعمنا في شغلنا على السيناريو.

لمعرفة أخبار إسلام، ممكن عمل "متابعة" لحسابه الشخصي على الفيسبوك

https://www.facebook.com/islam.belal2 

#سيناريو
#إسلام_بلال
#سيناريست
#تعلم
#كورس
#سينما