::Photos credit goes to its owner::
آخر تحديث في May 2018
ملحوظة: الحلّتين المستخدمتين هنا من سنة 2015 تقريبًا، لذا هناك موديلات/أنواع ظهرت جديدة وقد تكون بعض الملاحظات تم علاجها.
لإن معظمنا بيحب المقالي جدًا جدُا وخصوصا الأخت المُبجلة البطاطس ربنا يخليها لينا .. إلى جانب رغبتنا إننا نكون صحيين في طريقة الطهي عامة.
فكان لازم نشوف حل للموضوع دا، وخصوصا إننا مش عايزين نموت بسبب شريان مسدود بسبب عمو الكوليسترول ..
عادة الناس بتواجه مشكلة في اختيار الحلة الأنسب، وممكن بعد ما تشتري المشهور أو بناءً على اقتراحات الناس تكتشف إنها مش حلوة أو مش مفيدة زي ما كانت تتمنى منها.
لأن كل واحد هيتكلم عن الحاجة من وجهة نظره فقط، علشان كدا حبيت أعرض لكم مميزات وعيوب قلايات (تيفال وفيليبس) بشكل حيادي تمامًا، وعند تجربة فعلية معهم .. وعلى حسب تفضيلاتكم أختاروا الأنسب لكم.
النوع الاول: تيفال
فيديو لطيف كدا عنها
“تيفال” شركة نضيفة عامة، وفيها مميزات أكتر من عيوبها من وجهة نظري.
– الحلة واجهتها زجاج أو جزء شفاف بيخلينا شايفين الأكل وهو بيتسوى علشان منحسش بالقلق أنه قرب يتحرق وإننا مش شايفين وبتاع ..
– بداخلها جزء في النص بيقوم بتحريك الأكل خلال عملية التسوية، أما في حالة كان الأكل اللى جوه لين وخايفين يتعجن في بعضه، بيتم إزالة الجزء دا لانه مثبت بـ “كليبس” سهل الفك والتركيب .. وبكدا يتم التسوية ومحتويات الحلة مش بتتحرك.
– معاها معلقة مقياسية علشان نحط بيها الزيت بدل ما نقعد نجيب معلقة وكباية والأفلام دي ..
– بالنسبة للزيت المستخدم : بيتم عادة استخدام معلقة زيت نباتي – زيت الزيتون /زيت الذرة /زيت عباد الشمس – مع الأكل الني، أما الأكل المُجمد فلا يُستخدم معه زيوت….
ممكن عدم استخدام زيت من أساسه ودا التوجه الحالي بالنسبة ليا .. ولكن اعتقد أنه حاليا الموضوع أسهل شوية لإني خدت نفسي بالتدريج وتعودت على زيوت نباتية في الأول، وبعدين زيوت بكميات أقل وأخيرا بوقف استخدام الزيت خالص.
– سهلة الغسل بليفة طريه بالماء والصابون كون سطحها أملس ولا يعلق فيه الطعام.
– عمق الحلة: “التيفال” حلتها مدورة .. عبارة عن دايرة كبيرة.. فسمكها تقريبا بيتوزع على مساحة قطر الدايرة دي..
عملت فيها بطاطس وكانت الكمية مشبعة ولكن أعتقد انها كانت أقل من كمية البطاطس في حلة ” فيليبس” كون الحلة – كما أوضحت- مش عميقة بل مسطحة اكتر.
عملت فيها بطاطس وكانت الكمية مشبعة ولكن أعتقد انها كانت أقل من كمية البطاطس في حلة ” فيليبس” كون الحلة – كما أوضحت- مش عميقة بل مسطحة اكتر.
– عند استخدام القلاية لأول مرة أو على الأقل مرتين بتظهر ريحة منها بتوضح إنها لسه جديدة، زي ما حد يشغل المكيف أول مرة، أو جهاز تنقية لأول مرة.
– لاحظت إن بعض القلايات الباب بتاعها مش بيقفل بإحكام، وصراحة مش عارفة دا عيب صناعة ولا دا حصل لأننا بنشتري النوعية الأقل جودة من “تيفال” كونها في العروض والتخفيضات ومحدش بيخفض حاجة الا لو فيها عيب ما.
– فيه توقيت لكل أكلة بتضبطيها وتروحوا تعملوا المطلوب منكم وترجعوا تلاقي كله تمام.
للأسف واجهت مع الحلة بتاعتي مشكلة إن عند إنتهاء البروجرام ، تظل ترن زي الزنانة ومش بتتوقف عن التحريك الا لو جيت بنفسي قفلتها تماما وعطلت الرن بتاع التايمر، ودا بيعني إني لو تأخرت عن إغلاقها ممكن البطاطس تتحرق لإنها فعليا مش بتتوقف عن العمل الا لو أنا عملت دا بنفسي… و صراحة لا أعرف هل أيضًا بسبب إنها كوالتي / نوعية أقل بسبب إني اشترتها في التخفيضات ولا دا في المُطلق.
النوع التاني: فيليبس
فيديو برده لطيف كدا عنها
– كدابين في الأعلان لما بيوضحوا إنها بتتميز إنها ليست بحاجة لإضافة زيت.. لاء بنحط .. كاتبين في الكتالوج بتاعها إن لو البطاطس طازة وغير مُجمدة، نضيف لها نص معلقة زيت قبل ما نحطها (يعني نفس القلاية اللى فوق) ومش عارفة ليه بيخبوا الموضوع دا.
– زي ما وضحت فوق، أنه حاليا بدأت أمنع استخدام الزيت عموما فـ تجاهلت التعليمات الموجودة في الكتالوج.
– السمبوسة وأي طعام مُجمد لا نضيف له زيت لإنه أصلا نصف مقلي قبل التجميد .. مجرد نحطها تستوي وبتطلع مقرمشة وزي الفل.
– الإسكالوب والكفتة والفلافل وأي حاجة من اللى كانت زمان بتغطس في الزيت .. دي قبل وضعها في القلاية لازم تمسح الأكل بفرشة فيها زيت .. بحيث نكون مسحنا الوجهين بالزيت من فوق ومن تحت وبعدين تتحط عادي مع البروجرام بتاعها وهتبقى تمام.
– للاسف لا تحتوي على أي معالق لإضافة الزيت.
– فيها جزء معدني مستطيل بيخلي الطاسة الداخلية مقسومة لنصين، في حالة لو عايزين تعملوا صنفين مختلفين في نفس ذات الوقت.. ولكن مع العلم أن النوعين تكون التسوية الخاصة بيهم بتستغرق نفس الفترة الزمنية.. أي لا يتم وضع نوعين مختلفين تمامًا لكل نوع توقيت مختلف.
– عمق الحلة: “فيليبس” تعتبر عميقة من ناحية إن الحلة على شكل طبق عميق.. جربت فيها بطاطس وكانت كمية مشبعة بس لما بفصل الحلة لنصفين كل نصف كميته بتكون قليلة لانه عميق وليس عريض.
– الزرار الموجود في الحلة واللى بيفصل الشبكة عن الجسم، ساعات بيجي عليه وقت بيعلق وبيتنح ومش بيرضى يفصلهم عن بعض.
– إياكم وفتح باب القلاية وقت الشغل لانها بتبقى شغالة عن طريق ضغط الهوا ودا خطر جدا .. لازم التوقيت يفصل تماما علشان تقدروا تفتحوها بأمان… هو مفيش حاجة تمنعك من فتحتها لإنها مش زي الغسالات اللى ترفض الفتح وقت التشغيل .. بل الباب بيتفتح عادي جدا في أي وقت .. سواء شغالة أو لاء .. انا بس بتكلم عن المخاطر بشكل عام.
– بيقولوا في الكاتلوج إنه لما نحط حاجة وخاصة البطاطس إننا نقسم البروجرام على مرتين، بحيث نضبط على 10 دقايق مثلا فيفصل، نفتح الباب ونهز المحتوى شوية بقوة علشان ميلزقش وبعدين نقفل الباب ونشغل النص التاني من البروجرام.
– مشكلة الالة دي إنها متغطية تماما زي التابوت مش بتشوفي اللى جوه اخباره إيه .. في الاول لما كنا بنمشي زي الكاتلوج بالضبط كان ساعات البطاطس المجمدة بتتحرق ..
– لما بنخلص استخدامها لازم نخرج الباب خالص ونبعده عن القلاية علشان تبرد تماما .. بعدها لازم تتغسل بوضع ميه سخنة مع شوية صابون صغيرة وتركها شوية علشان تدوب الدهون العالقة في الحلة .. ثم بيتم غسلها بسفنجة طرية علشان نبعد عن تجريح الحلة .. ثم تركها تنشف تماما ومن ثم استخدامها تاني.
بالنسبة ليا كنت بشوف أن غسل الشبكة صعب، لإنه عالق فيها دهون أو بقايا، وفيه أماكن صعب الوصول لها بـ “لوفة الأطباق” .. ولو حصل وتم إهمال غسيلها بشكل دوري بعد كل أكله، أو حصل تأخير في غسيلها بتترسب الدهون والبقايا وممكن يحصل صدى وبتكون غير صحية.
بس كدا .. لذا بعد القراءة دي .. جيبوا ورقة وقلم واعملوا قائمة بالحاجات والمميزات المهمة ليكم أنتم وبس .. أكتبوا عند كل نوع الاختلافات مثال: السعر، سعة الحلة، سهولة التنضيف، أماكن البيع والصيانة، أقدر استخدمها في ايه غير للبطاطس… الخ
ولما تشتروا ارضوا بإختياركم واستمتعوا بيها لأن أي حاجة ليها موديلات أحسن هتظهر مع الوقت، وأسعار تانية ودنيا تانية فبلاش تحطوا نفسك في ندم من أي نوع هتختاريه لأنه ناسبك إنتي /أنت في الوقت اللى أنتم كنتم محتاجينها فيه.
ونصيحة كمان مرة.. فعلا كل بيت محتاج قلاية صحية علشان إحنا اتعودنا مناخدش بالنا من صحتنا وسايبنها على ربنا أنه يسترها من عنده.
الأكل الصحي مش لازم علشان دايت .. أصلا دايت الحرمان دا تخلف عقلي وبيأذي الجسم .. الحاجة الصح إننا ناكل كل حاجة بشكل صحيح وبكميات معقولة ونقلل الدهون وكمية العك اللى بندخله جسمنا بدون ما نفكر.
انا أعرف سيدة ألمانية صديقة للعائلة .. بتاكل الأكل صحي فعليا لدرجة إنها بتصنع المكرونة في بيتها .. بتعمل الصلصلات وكل ما تتخيلوه بيتصنع في بيتها .. مستحيل تاكل حاجة مُصنعة وليها مواد حافظة أو ألوان .. وما شاءالله هي وجوزها كبار أوي في السن وصحتهم ممتازة وبيتحركوا وبيروحوا وبيجوا..
ياريت لما أكبر أبقى زيهم بصحة وقوية مش زي الستات والرجالة عندنا لما يتموا 40 بيكونوا شبه الميتين وعندهم كِرش ومش عارفين يروحوا ولا يجوا وعندهم أمراض الدنيا ولا بيتنفسوا زي مخاليق ربنا.
فبجد لو تقدروا تحطوا ميزانية ليها، تحوشوا ليها، وتفكروا جديا إنكم تشتروا قلاية مفيدة زي الأمثلة اللى فوق.. علشان تقدروا تاكلوا المقالي زي ما انتم عايزين وفي نفس الوقت القلب ميتضررش ..
#قلاية_صحية #نظام_حياة
#تيفال
#فيليبس
#بطاطس_صحية
#airfryer
#تيفال
#فيليبس
#بطاطس_صحية
#airfryer
No comments:
Post a Comment