سيكل - الذكاء العاطفي (الوعى بالذات)

::Photo credit goes to its owner::

- مؤخراً بقيت اتفرج على بعض فيديوهات الشيخ الحويني القصيرة - كنوع من الفضول - و خصوصاً على فيديوهات النصايح اللي بيقدمها لأتباعه في أمور الحياة و كدا، ف فتحت فيديو كان بيتكلم فيه عن الزوجة الصالحة فلقيت ان الشيخ بيقول أن المرأة الصالحة بتعرف جوزها عاوز إيه بسرعة و من غير ما يتكلم.

ف أنا لقيت أن فكرة شريك الحياة اللي بيعرف شعورك من غير ما تتكلم هو مطلب عام عند الجميع، ف هو عند السلفيين من مميزات المراة الصالحة،  و هو عند غير السلفيين من مميزات الراجل اللي بيفهم، ولعل فكرة مين اللي بيقيم ويطلب مميزات في شريك الحياة دي تستحق التعليق بس مش حالاً يعني . 

- قدرة الشخص على فهم شعوره و فهم شعور غيره هو نوع من انواع الذكاء التسعة الموجودة عند الإنسان اسمه الذكاء العاطفي Emotional Intelligence EQ.

و الذكاء العاطفي هو الصفة المثالية اللي كل شخص بيتمناها في شريكه اللي هيرتبط بيه أو في أهله اللي هو عايش معاهم أو أصدقائه و أي علاقة حميمية intimate في حياته .

و دا بيرجع لأن الإنسان بيخاف جداً من الشعور بالوحدة fear of solitude و الانعزال عن اللي حواليه، ومن صور الشعور بالوحدة هو إنك تحس ان اللي قصادك مش متفهمين مشاعرك أو مش قادرين يترجموها صح أو بيترجموها غلط، و لعل دا من أحد أهم الأسباب اللي بتخلى أي حد بيعاني من مرض نفسي أو مشكلة شعورية يلجأ للعزلة، لأنه حاسس إنه مش قادر يوصف مشاعره الغريبة عليه وكل اللي حواليه مش قادرين يفهموها منه فبيحس أنه وحيد و منعزل شعورياً عنهم فـ بيلجأ للعزلة الجسمانية كمان

لذلك من أكتر الأوصاف اللي بنوصف بيها شخص إحنا بنحبب و نحب علاقتنا بيه إننا نقول " إنه بيفهمني كويس " والفهم هنا مش معناها فهم عقلي و لكنه المقصود بيه فهم مشاعري . 

- قدرة الشخص على أنه يتفهم شعورك هو جزء من أجزاء الذكاء العاطفي اسمه التعاطف empathy ودا اللي الناس كلها بتتكلم عنه على أنه هو الصفة المثالية المطلوبة، و لكن الشخص عشان يطور الجانب دا من ذكاءه العاطفي محتاج يكون طور بالفعل باقي الجوانب اللي لازم تكون موجودة عشان الشخص يتصنف ذكي عاطفياً ويعرف يبقي متعاطف معاك

يعني عشان تبقى ذكي عاطفياً و عندك تعاطف empathy محتاج يبقى عندك باقي العوامل اللي بيقوم عليها الذكاء العاطفي عالية

يعني الشخص عشان يكون عنده تعاطف empathy معاك و يقدر يفهم شعورك و يتواصل معاك محتاج إنه يطور باقي الجوانب، زي مثلاً جانب الوعى بالذات self awareness و دا اللي هتكلم عنه دلوقتي وأسيب الباقي لبوست بعدين.

الوعى بالذات self awareness ببساطة هو إمكانية الشخص على التعرف على شعوره الخاص و قدرته على تحليل حالته النفسية الحالية و وصفها في كلمات أو أي نوع من أنواع الوصف زي الرسم أو إبداع أي عمل فني أو أدبي زي انك تكتب قصيدة أو رواية تعبر عن مشاعرك الخاصة

ولما بعض علماء النفس حاولوا يحطوا اقتراحات لتطوير قدرة الفرد على الوعي بذاته قالوا :

1 . انه محتاج يزود حصيلته من الكلمات vocabulary اللي بتوصف المشاعر عن طريق قراية كتب الأدب و الرويات و الأشعار، ودا لأن الأدب الحقيقي القوي بيعرف الشخص على ألوان جديدة من المشاعر ومن الحالات النفسية اللي ممكن تعدي بالإنسان،  ولإن أنواع الحوارات dialogues الموجودة في نصوص الكتب الأدبية بتخلي الفرد يتعلم إزاي يعبر عن مشاعره بإسلوب مشابه جداً للموجود قصاده، ولعل الناس اللي بتقرى أدب كتير بتلاقي نفسها متأثرة جداً في وصفها لنفسها بأسلوب الأديب اللي بيكتب .

2 . البيئة السليمة اللي بتحفز التواصل communication بين أفرادها، ولعل دي نقطة مهمة جداً وجب التأكيد عليها،  و هو إن الشخص عشان يكون عنده القدرة على تفهم شعورك الخاص و على الاستماع و الإنصات ليك لازم يكون حصل على نفس الفرصة منك أنه يوصفلك شعوره الخاص و إنك تكون سمعته.

 يعني بمعنى أبسط، عشان يفهم مشاعرك و يفهم تعبيرك عنها محتاج يكون خد الفرصة إنه يعبر عن مشاعره معاك و أنت حاولت تفهمها معاه .

- لعل من النقطة رقم ( 2 ) يطلع لنا حاجة مهمة جداً إننا نستعرضها، وهو ظن الناس أن الشخص اللي عنده تفهم empathy المفروض عليه أنه يفهم مشاعرك وأنت ساكت أو بالمعنى المتداول " يحس بيك من غير ما تتكلم "

 وللأسف فـ الاعتقاد الخاطئ دا بيخلي الناس تحط بعض في نوع من أنواع الأذى النفسي emotional abuse وهو اسمه ال silent treatment و دا معناه أن طرف من الطرفين يفضل ساكت نهائياً مستني الطرف التاني أنه يتفهم شعوره من غير ما يتكلم،  ويستمر في صمته كمان شوية عقاباً لشريكه إنه لحد دلوقتي مفهمش ودا شيء مؤذي جداً وزي ما قولت انه متصنف من عالم النفس Harriet Braiker أنه نوع من أنواع العقاب النفسي الشديد والمؤذي . 

دا البوست الأول عن الذكاء العاطفي للي حابب يقرأ أكتر

https://www.facebook.com/2010.hamed.ahmed.hamed/posts/1610864392300156

دا مقال عن ال silent treatment

https://www.psychologytoday.com/us/blog/ambigamy/201110/the-silent-treatment-when-people-leave-you-guessing

#cycle #hamed_ahmed #emotional_abuse #silent_treatment #self_awareness #Emotional_Intelligence

#سيكل #حامد_أحمد #وعي_بالذات #إيذاء_عاطفي #ذكاء_عاطفي