سيكل - الذكاء العاطفي والشخصية النرجسية

::Photo credit goes to its owner::

- قدرة الشخص على تفهم شعوره الشخصي وتفهم شعور الناس من حواليه هى نوع من أنواع الذكاء التسعة

 اسمه الذكاء العاطفي emotional intelligence والتعاطف مع الغير empathy هو ركن من خمس أركان بيحددوا نسبة الذكاء العاطفي عند الشخص .

و الذكاء العاطفي عند الناس هو شبه أي ذكاء في كونه يمكن زيادته و تطويره بالاهتمام بيه.

دا فيديو تتعرف فيه أكتر ع الذكاء العاطفي

https://www.youtube.com/watch?v=Y7m9eNoB3NU

- لما جينا في cycle نتكلم عن اضطراب الشخصية النرجسية Narcissistic personality disorder قولنا صفة هامة جداً من صفاته و اللي أنا بحسها صفة مميزة جداً وليها علاقة بالذكاء العاطفي عند الشخص دا، و هي غياب أي إحساس عنده بالتعاطف تجاه حد lack of empathy , بمعنى ان الشخص النرجسي دا معندوش القدرة نهائياً انه يتعاطف معاك أو يحس بمشاعرك و يتعامل معاها.

و دا - باختصار - لأن النرجسية هو اضطراب ف الشخصية بيخلي صاحبه متمركز حول ذاته self centered بمعنى أن الشخص النرجسي هو شخص غير مهتم إلا بذاته هو وبسعادته الشخصية والحاجات اللي المفروض الطرف التاني يقدمهاله وتلاقيه دايماً عنده list كامل بالحقوق بتاعته، بس معندوش أي علم بالحاجات اللي بتفرح الطرف اللي معاه في علاقة او إيه هي الحاجات اللي المفروض يقدمهاله و تلاقي مفيش list بالواجبات اللي عليه.

- النرجسية اضطراب ممكن الشخص يصاب بيه بسبب جيناته اللي ورثها من أهله و ممكن بسبب أزمات في مرحلة الطفولة بتحصل للشخص - يطول شرحها - و دا مشترك بينه و بين باقي اضطرابات الشخصية personality disorders  الموجودة.

ولكن اللطيف ف النرجسية انها ممكن تبقى صناعة مجتمعية بمعنى إن المجتمع هو اللي يغير سلوك أفراده ويخليهم نرجسيين.

و دا بيكون شائع في المجتمعات التنافسية أكتر أو في المهن اللي فيها صراع مستمر بين أفرادها، و دا لأن التنافس الشديد بين الناس بيخليهم مهتمين جداً أثناء تنافسهم بتحقيق أهدافهم الشخصية و الحصول على كل ما هو مفيد ليهم و لو على حساب غيرهم،  وبيفقدوا تدريجياً اي قدرة على الالتفات لإحتياجات غيرهم و بيفقدوا تدريجياً القدرة على التواصل و التعاطف مع مشاعر الغير، ودا بينعكس بصورة أنا لاحظتها في علاقاتهم الشخصية مع أزواجهم و أبنائهم و كل علاقاتهم المقربة . 

- من أكتر الحاجات اللي أنا شايف ان كل واحد لازم يهتم بيها أنه يكون له بيئة غير تنافسية بالمرة، بيئة معينة بعيد عن مجال شغله مثلاً ميكونش هدفه فيها إنه يظهر نفسه أو يعلي من قيمتها، مكان معين يكون دوره الوحيد فيه إنه يهتم بغيره مش يهتم بنفسه زي إنه يشارك ف الأعمال الخيرية او إنه يقدم أي صورة من صور المساعدة للناس و الإهتمام بطلبات غيره مش طلبات نفسه.

الأماكن دي بالذات بتخلي الإنسان عنده قدرة إنه ينمي جزء الـ تعاطف تجاه الناس empathy واللي بدوره هيعلي ذكاءه العاطفي ويخليه متفهم لمشاعر غيره ومشاعر نفسه أكتر.

 

-  أنا بحترم جداً نوعية الأصدقاء أو المعارف اللي الشخص بيتعامل معاهم و مبيكونش حاسس إنه عاوز يبهرهم بأي صورة من الصور أو يستعرض إنجازاته قدامهم،  الناس دي التعامل معاهم صحي جداً ف نحافظ عليهم . 

                                                                                                                 

#cycle #hamed_ahmed #emotional_abuse #silent_treatment #self_awareness #Emotional_Intelligence

#سيكل #حامد_أحمد #وعي_بالذات #إيذاء_عاطفي #ذكاء_عاطفي