::Photo credit goes to its owner::
ازاي اقدر اساعد "صديق في علاقة مدمرة "؟
سؤال متكرر ومهم .. والأهم منه هو أن احنا نعرف ونحدد دورنا في حياة الصديق اللي هنساعده ..
في ناس كتير بتلخص دور المساعدة في انها "بتقطم أو بتلوم" الطرف اللي بيتعرض للأذى بحجة أنها بتفوقه وانها بتقول كمة الحق والكلام ده ..
ولكن ..
مهم نعرف أولا .. ان دي مش مساعدة ده ممكن يتحول في درجة من الدرجات لأذى وعنف نفسي .. ولوم ضحية ..
وثانيا أنت بتضغط على الطرف التاني ده عشان ياخد قرار ممكن ميكونش مستعد ليه أو مش مقتنع بيه أو غيره .. وبالتالي انت بتقتحم حدوده الخاصة في اتخاذ القرار بطريقة غير مباشرة وده بيؤدي لفشل المحاولة واللي ممكن برده تؤدي لانتكاسة أكبر ..
طيب أمال أنا مساحتي في المساعدة لصديق عرفت وتاتكدت انه في علاقة مدمرة ..
1. اسمع ..
عادة الضحية في العلاقة المدمرة بتكون محتاجة حد يسمعها وميحكمش على كلامها أو أفعالها أنها ضعيفة أو غلطانة أو غيره .. محتاجة بمساحة آمنة تحكي فيها بدون لوم أو أحكام ..
أكبر مساعدة تقدر تقدمها للشخص ده هو أنك توفرله المساحة دي إما معاك لو انت تقدر أو توجهه لحد يقدر يوفرهاله ..
2. وعي ..
مهم أنك تزود وعيك بالعلاقة المدمرة وأشكال الأذى واحتياجات الضحية .. وتساعده هو كمان يتلقى الوعي ده . يا اما يتكلم مع حد متخصص أو أنه يحضر ورشة مهتمة بالعلاقات المدمرة .. ويتواجد في مجتمعات صحية مناسبة ..
ومن الممكن كمان لو انت عندك الوعي الكافي انك تتكلم معاه وتفهمه هو بيتعرض لايه .. وتكون واضح معاه وأمين .. يعني لا تخفف من الحقيقة ولا تهول منها ..,ومتحتكرش الحلول لنفسك .. يعني تقوله يا تعمل كذا يا تعمل كذا .. لا هو محتاج يدور ع الحلول المتاحة بالنسبة ليه ويختار منها ..
3. ادعم ..
الضحية بتحس انها لوحدها .. هي في جهة والعالم كله في جهة .. وأن أي دعم هيكون يشبه أي حاجة بتتقدم ليها جوة العلاقة بمعنى أنها لازم تكون مشروطة ..
دعم / مشاعر / حب/ مشروط ..
فبالتالي هي بتعتقد انها عشان تلاقي الدعم لازم تتصرف زي ما انت عاوز .. لكن هي او هو محتاج دعم غير مشروط ..
"أنا جنبك سواء كملت أو مكملتش .. سواء اختارت الطريق ده أو الطريق ده وهساعدك تحقق اللي انت هتختاره"
- مهم توضح أنك مش شايفه مسئول عن الأذى اللي بيتعرضله أو ده خطأه او يستحقه ..
- صدقه .. متخوفوش .. متقللش من أوجاعه أو كلامه ..
4. ركز على نقاط القوة ..
الضحية في العلاقة المدمرة بتكون شايفة نفسها ضعيفة معندهاش أي نقاط قوة أو مميزات .. فاقدة الثقة بنفسها .. رؤيتها عن ذاتها من خلال الشخص المؤذي ..
مساعدتها في استعادة الصورة الايجابية عن ذاتها وانه يكون مصدرها نفسها .. وتسمع كلام ايجابي "في حياة افضل مستنياكي، انتي تستحقي الأفضل، أنتي جميلة ولكنا بنحبك، في ناس كتير مهتمة بوجودك، وهكذا"
5. ساعد في الخطوات ..
لو عندك امكانية انك تشاركها في خطوات خروجها من العلاقة المدمرة وتساعدها كمان انها تخرج بأمان وأقل خساير .. هيكون شئ عظيم ..
6. حافظ على الحدود ..
الششخص المؤذي بيتخطى كل حدود الضحية .. هي بتكون عارية بلا حدود حرفيا .. وبالتالي ممكن أوي تكون قدامك شبه الطفلة اللي فاقدة مامتها وعاوزة حد يتحمل مسئوليتها كليا .. وده ممكن يحملك فوق طاقتك أو يسبب ليك مشاكل .. كمان ممكن ده يسمحلك تتعدى حدود كتير وانت بتساعدها .. كون يقظ جدا وركز انه في حدود لازم تحافظ عليها .. زي اتخاذ القرار .. المسئولية المادية .. الحرية في المعتقدات والأفكار
البوست الأصلي على الفيسبوك
#superwoman_story
#cycle
#abusive_relationship
#ورش #سوبروومن #الزقازيق
#آية_منير
#دعم_نفسي #علم_نفس #صحة_نفسية
No comments:
Post a Comment