ترتيب الفراغ لأجل إنتاجية أفضل

 ::Photo credit goes to its owner::

بمناسبة الامتحانات :D

انتاجية الفرد في عالم الديكور بترتبط بمعايير كتير في تصميم الفراغ اللي الفرد ده بيؤدي فيه عمله .. فبالتالي الشركة مثلا اللي مهتمة تزود انتاجية موظفينها من المفترض أنها تلجأ لتصميم فراغات عمل مناسبة لاحتياجاتهم ..

طيب والمذاكرة .. نفس الفكرة !! أدائك وانجازك في مذاكرتك وتحضيرك للامتحان بيعتمد بشكل رئيسي على الفراغ اللي أنت بتذاكر فيه ..
طيب ..

ازاي ارتب فراغ مذاكرة مريح .. 

 
هما 3 اتجاهات هنهتم بيها وانت بترتب الفراغ اللي هتذاكر فيه ..
1. البيئة المحيطة ..
2. الأدوات ..
3. التصميم ..

========

1. البيئة المحيطة ..

بص يا كابتن .. مينفعش تذاكر وانت جنبك أي حاجة تشتت انتباهك زي ..
- الموبايل ..
- البلايستيشن ..
- وسط أفراد الأسرة العزيزة ..

الهدف الرئيسي من تصميم فراغ دراسة هو زيادة تركيزك على الهدف اللي انت هتقعد تعمله :D
وتبقى أول خطوة في ترتيب فراغ مذاكرة مناسب .. هو اختيار موقع بعيد عن كل ده ..

2. الأدوات ..

بعد ما اختارنا الموقع بنشوف ايه هي الأدوات اللي هتستخدمها في مذاكرتك وازاي تخلي وصولك ليها سهل ..
- بتعمل قايمة باحتياجاتك من ورق وأدوات وعناصر أساسية بطرق مبتكرة ومرحة وخفيفة عشان تشجعك على المذاكرة ..
 
- خلي قايمتك لعناصر أساسية وعناصر ثانوية .. وده هيساعدك تفكر نفسك أن المسطرة اللي انت مأجل مذاكرة مادة كاملة عشانها مش عنصر رئيسي ويستاهل نوقف عشان المسيرة التعليمية :D

3. التصميم ..

وهو أكتر شئ مهم نتكلم عنه .. واللي بيعتقد كثير أنه عايش في فراغ صعب تصميمه بشكل مناسب للمذاكرة والتركيز ..

كل اللي محتاجه في فراغ المذاكرة هو ..
أ - إضاءة مناسبة ومتنوعة ..
ب - أثاث مريح لجسمك ..
ج - تهوية جيدة والحفاظ على درجة حرارة مناسبة لجسمك طول الوقت ..
د - أفكار مبتكرة تساعدك على المذاكرة ..

أ - الإضاءة ... 
 
- بالتأكيد اتجاه الإضاءة وقوتها هيفرق معاك كتير لو بتذاكر .. يعني الإضاءة متكونش في وشك تضايق عنيك وتسببلك صداع أو في ضهرك فتلاقي خيالك طول الوقت مانع رؤيتك .. أو ضعيفة فا تخليك مش مركز وتساعدك على النوم أو قوية جدا لدرجة الازعاج .. 
 
- كمان لو بتستخدم لاب توب تكون الإضاءة مش ضاربة في الشاشة فتضايقك ..
 
- اختيار عناصر متنوعة للإضاءة زي أباجورة وإضاءة رئيسية في الفراغ بيساعد على تحكمك بشكل رئيسي في الإضاءة .. وتنوع لطيف ..
 
- استمتع بإضاءة طبيعية لو متاحة في جزء من اليوم .. خلي وضع مكتبك أنه يكون الشباك على شمالك لو "أنت بتكتب باليمين والعكس لو بتكتب بالشمال"

ب - الأثاث المريح ..
- الكرسي المريح بيفرق كتير جدا في المذاكرة واهتمامك بيه لازم يكون شئ رئيسي وانت بتذاكر عشان تتجنب احساسك بألام في الضهر بعد وقت قصير وتقوم تريح  

- المكتب أو الترابيزة اللي هتذاكر عليها حاول تكون بتتحرك وخفيفة عشان متحسش نفسك محكوم ومتثبت في مكانك كمان في نصيحة لقيتها على موقع لطيف كده أنه بلاش تكون بادراج كتير مليانة حاجات كتير تشغلك وانت بتذاكر ..

- حافظ على مستوى المكتب بتاعك مناسب ليك .. ميكونش منخفض أو عالي أوي ..
- ابعد عن الألوان القوية أو الفاقعة وخليك في الألوان الباهتة الفاتحة والمشرقة ..

ج - التهوية ودرجات الحرارة ..
لازم مكان مذاكرتك يتهوى كل يوم مدة كافيه الصبح في وقت ما قبل الساعة 12 ظهرا .. وكمان ياريت يكون المكان درجة حرارته كويسة في الصيف والشتا .. "تكييف أو دفاية" على حسب الاحتياج .. عشان لو ساقعة أوي أو حر أوي مش هتقدر تركز ..

د - أفكار مبتكرة وشوية نصايح .. 

 
- ممكن تضيف لفراغ مذاكرتك سبورة وتشرح لنفسك بصوت عالي عشان تركز أكتر ..
- نضافة مكان مذاكرتك أهم من أي حاجة تانية ..
- ترتيب مكان المذاكرة يرجع لرغبتك واحتياجاتك وأولوياتك ..
- لو بتحب تذاكر على مزيكا أو صوت هادي جنبك .. يفضل ده يكون متجهز من قبلها "بلاليست ممكن"
- ومتنساش البريك :D

#furnish_your_home
#study_corner
#more_effective
#interior_design
#Decorate
#continued

البوست الأصلي على الفيسبوك:

https://www.facebook.com/photo.php?fbid=627990734212867