بمناسبة اليوم العالمي للإنتحار

::Photo credit goes to its owner::

- بمناسبة اليوم العالمي للإنتحار فالنسب الموجودة بتقول إن رغم إن معدلات الإكتئاب أكتر في الستات و محاولات الإنتحار #suicidal_attempts أكتر إلا إن معدلات الإنتحار أكبر في الرجالة بنسبة تعدى ال60 في المية، و متوسط أعمارهم من 20 إلى 24 سنة، و بيكون بنسب أقل في المراهقين و العواجيز.

الداعي النفسي الأكبر للإنتحار عند الرجالة هو الإحساس بالعار shame و عدم قدرته على تقبل الخسارة و الفشل و إحساسه ب إنه عديم القيمة، و دا بيظهر أكتر في الأزمات المادية أو الإفلاس اللي ممكن يقع فيها بعض الرجالة.

الرجالة على عكس الستات عندهم إمكانية أكبر على تحمل الأزمات النفسية و التحكم في مشاعرهم #emotional_regulation وبيحاولوا يتأقلموا على عدم التصريح بيها لأن التصريح بمخاوفهم و ضعفهم و هشاشتهم النفسية #vulnerability هو عكس توقعات المجتمع منهم، بعكس الستات اللي عندهم الصلاحية الكاملة إنهم يعبروا عن ضعفهم. 

أنا مقدر جداً هلع أغلب الرجالة من المرأة الطموحة و دا لأنهم بيحسوا ناحيتها إنها مش سهل إرضاء طموحها، و بيحط الرجل المرتبط بيها دايماً تحت التقييم، "هل هو ناجح كفاية ولا فاشل في وجهة نظرها و محققش حاجة؟"

 وإن راجل يتحط تحت تهديد مستمر إنه ممكن يتصنف فاشل و عديم القيمة دا أكبر استنزاف نفسي ممكن يحس بيه.

أنا مش ضد الطموح عند الستات نهائي، بس أنا مع الرأفة بالراجل خصوصاً في الجانب دا من طبيعته النفسية اللي ممكن تتحمل ألم نفسي بدرجات كبيرة و لكن ميتحملش إحساس الفشل و العار.

يعني ممكن الست تطمح لأكتر من الموجود وتدفع رفيقها و حبيبها لأبعد من إمكانياته لكن دا بيحصل في حالة إنها توصله شعور حقيقي إن مفيش أي أزمة في الفشل وإنه هيفضل بنفس قيمته تحت أي ظرف. 

الحب في رأيي و تصورى كـ راجل هو المكان الآمن اللي أنت مش مضطر تثبت فيه أي شيء لرفيقتك، هو السلام النفسي و قبولي و إعترافي إني ضعيف و محتاج مساعدة بعد أيام كتير بثبت فيها للجميع إني قوى و مستقل.

 الحب هو التخلص من الوشوش اللي لبسناها عشان تخبي عيوبنا و نظهر للمحبوب بملامحنا المتواضعة جداً بل والمغرقة في تواضعها، الحب هو الموت في سلام بعد حياة طويلة مليانة بالمعارك.

ممكن تسمعوا فيديو أغنية Now we are free في نهاية فيلم The gladiator و هي ممكن توصل المعنى. 

البوست الأصلي على الفيسبوك

https://www.facebook.com/2010.hamed.ahmed.hamed/posts/1801988316521095

الأغنية:

https://youtu.be/SD4j1QNOg60

#cycle #hamed_ahmed

#سيكل #حامد_أحمد #انتحار #اليوم_العالمي_للإنتحار