ما هو تعريف التحرش الجنسي؟

::Photo credit goes to its owner::

(مرفق في البوست الأصلي على الفيسبوك صور لـ تعريف التحرش الجنسي، فأرجو مراجعتها)

- و أنا بحاول أدور على تعريف للتحرش الجنسي لقيت إن لجنة الولايات المتحدة لتكافؤ فرص العمل EEOC حطت تعريف شايفه كويس جداً للتحرش الجنسي:

"Unwelcome behavior of sexual nature"

ترجمتها:

" سلوك غير مرُحَب به له طابع جنسي"

- اللجنة حطت أمثلة كتيرة جداً للسلوكيات اللي يمكن إدراجها تحت تعريف التحرش الجنسي في منها مثلاً اللي ممكن نتوقعه أو إحنا فعلاً عارفينه زي اللمس و الكلام الجنسي المباشر و أشباهه، و أدرجت كمان أمثلة تانية زي ألفاظ الدلع الجنسية وعرض offer لخدمات غير مرغوب فيها لأغراض جنسية،

والمثال اللي أنا عامل عليه سهم و هو unwanted pressure for date و دا معناه إنك تصغط على حد عشان معاد بأي صورة و اللي ممكن نسمى واقعة التجمع الخامس "تحرش جنسي" بناء عليه.

أنا عاجبني في الكلام دا نقطة هامة جداً و هي إن اللجنة محاولتش تفرض تعريف واحد شامل لتحديد ما هو التحرش الجنسي، و لكنها سابت مساحة شخصية subjective في التعريف، بمعنى إن اللي بيحددها هو الشخص اللي اتعرض للتحرش نفسه.

من أهم التعريفات اللي بيحتاج الشخص يعرفها عن معنى الأذى عموماً سواء جنسي أو نفسي أو جسماني هو إن شعورك بالأذى أو عدمه هى تجربة شخصية subjective بحتة، يعني ما يمكن أن يتقبله غيرك و يتأقلم معاه نفسياً من الشتيمة مثلاً مش بالضرورة تكون انت بتعرف تتقبله و تتأقلم معاه نفسياً، و ما يتقبله غيرك من السلوكيات الجنسية مش بالضرورة انت تقبله.

في رأيي إن تراثنا الثقافي الفقهي حاول يحل المشكلة دي لكنه فشل في الإستمرار بسبب نقص آليات الإستمرار.

بمعنى إن في أحاديث عن النبي - صحت أو ضعفت- عن زنى العين وزنى اللسان وزنى اليد وغيره، كانت أكيد بتمنع ظواهر زي كدا في المجتمع بصورة ما، و لكن في رأيي إن الأساليب دي فشلت في الإستمرار لسببين:

1. استعمال اللفظ "زني" على كل الأفعال دي مع العلم إن الزنى يعتبر من الكبائر، دا خلى الكلام إلى حد ما غير معقول عند الناس أو شافوه تشدد من الشيوخ فأهملوه، و الحل في رأيي هو إدراج المصطلحات دي عادي من غير كسوف في الخطاب الديني.

لو موجود يبقى خير و بركة نكتر منه.

2. علاقة الأذى بالجنس التاني فيما يخص التحرش الجنسي متحدد العقاب فيها آخروي من الله بس، بمعنى إن الناس لما بتمنع أذاها عن غيرها هو عشان الذنب الآخروى فقط، بس محدش بيمتنع مثلاً عشان الأذى النفسي اللي ممكن يصيب بيه الطرف التاني، و دا ظهر بشكل واضح جداً في موضوع الدكتور النفسي الأزهرى اللي قال طالما الستات ملبستش حجاب يبقي من حقي أتحرش.

و هنا في رأيي إن توجيه مسئولية الناس تجاه بعض، بمعنى إنى مش هقوم بالفعل الفلاني عشان خاطر مش أسببلك أذى و بالتالي حالتك النفسية تؤثر على حياتك و أسرتك هو دافع جميل للتمسك بالأخلاق لو الدافع الآخروي مش كفاية.

#cycle #hamed_ahmed

#سيكل #حامد_أحمد #تحرش #لوم_الضحية

البوست الأصلي على الفيسبوك:

https://www.facebook.com/2010.hamed.ahmed.hamed/posts/1786458594740734