::Photo credit goes to its owner::
مقالة لـ آية منير
الحقيقة إني بالصدفة النهاردة شوفت سيدة في المترو، أعتقد أربعينية إن كان تقديري صحيح ..
جسمها هزيل جدا جدا .. لابسة عباية سودة عليها تطريز مش كامل، وشايلة كيس كبيرة جدا وزنه نظريا أكبر منها بكتير، وبتدخل المترو وهي شايلاه وجسمها كله بيرتعش ..
بتتمالك نفسها وبتخبي دموعها وأنا مش عارفة مركزش معاها .. ولأول مرة اتشجع واقتحم دايرة حد وأروح اسألها محتاجة حاجة وترد تقول “لا ربنا يخليكي”، وابتسمت ليها .. ومشيت ..
بعد ما نزلت المترو .. فضلت أفكر في كل البوستات اللي بتحكي عن الناس البسيطة والوجه الآخر بتاع الناس الراضية وكونسبت “الحمد لله” بتاع فيلم عسل أسود ..
وقعدت شوية أتخيل حياة الست دي .. وهي بتتعرض لإيه ..
وفكرت لو كتبت بوست بتأمل في رضا الست دي وعفة نفسها ورفضها المساعدة ورغبتها أن محدش يشوفها بتعيط رغم أن رعشة جسمها ملفتة جدا لأي حد .. وأنه الله يا جماعة شوفوا الناس اللي صابرة ع الابتلاء .. ده هيكون شئ إنساني فعلا ؟
امبارح اتكلمنا في cycle عن مفهوم “المجتمعات النرجسية” وهو مصطلح ظهر مع لمحلل النفسي “إريك فروم”، وعالم الاجتماع “تيودور أدورنو” .. واللي نشطت الدراسات حواليه تاني بعد نجاح ترامب في أمريكا ..
لأنه ظهرت دراسة بتقول أنه أغلبية اللي صوتوا لـ “ترامب” في الانتخابات مصنفين ضمن النرجسية الجماعية ..
الحقيقة أني قريت مقال كان بيحلل اختلاف المعايير في المجتمعات النرجسية واللي بتعتمد في الأساس على وجود طبقية وعنصرية وغيرها من السمات اللي بتعزز شعورهم بالاستحقاق والتميز ..
وكان بيوصف بدقة فعل الناس اللي بتتصور مع حد فقير جدا وهو مبتسم وتكتب تحت الصورة “الفلوس مش كل حاجة .. الأهم الرضا”.
وهي أن الأشخاص في المجتمعات النرجسية بتعيش حالة من انكار الواقع ورفض فكرة أن في ناس بتعاني .. هو مش حاسس بيك .. ورافض يشوف معاناتك .. فـ بيقرر يغلفها بطابع جميل يخليك تبتسم وتقول “الله هو ده معنى الحياة اللي بندور عليه”
أو “مش كل الأغنياء سعداء، وفي فقراء في راحة بال أكتر”
ومبررات لا نهاية لها ..
الحياة غير عادلة .. أعتقد أن ضرورة توقفنا على بروَزة المعاناة في شكل الرضا أو “توزيع الأرزاق” هو من أهم الخطوات اللي يجب تحقيقها الفترة الجاية لأنه ده شئ قاسي جدا وغير عادل بقدر المعاناة نفسها ..
الـ post الأصلي على الفيسبوك:
لمعرفة أخبار الورش وأماكنها يمكنكم متابعة صفحة Superwomen stories
#cycle #aya_moneer
#آية_منير #تدوينة_كل_يوم #نرجسية #المجتمعات_النرجسية
No comments:
Post a Comment