::Photo credit goes to its owner::
مقالة لـ حامد أحمد :: عن إرتباط الأم بطفلها::
– من الشائع جداً إننا نشوف أم لما ابنها يعيط قصادها من الخوف إنها تعيط هي كمان من الخوف، ولما يكون الولد متوتر تلاقي الأم متوترة جداً هي كمان، و دا غالباً بيحصل ف الأمهات الصغيرين مع أول مولود ليهم دايماً، لأن الأم ساعتها بتكون أول مرة تتعامل مع وضع زي كدا و مرعوبة من المسئولية اللي عليها.
الصورة دي بتعكس عند الناس حاجة غير المطلوب عنها تعكسه و هو إن إزاي الأم حاسه بإبنها والكلام دا… بس دا مش سليم.
– في نظرية علمها John Bowlby بتتكلم عن أشكال ارتباط الابن بالوالدين، و إن الشكل اللي بيتربي بيه الابن و بيرتبط بوالديه بيه هو الشكل اللي بيطبع طبيعة علاقاته و ارتباطه بأبنائه و زوجته و كل علاقاته بعدين…
و النظرية اسمها attachment theory / نظرية الارتباط ( مش متأكد من الترجمة ).
– من الملفت بقى إن النظرية أتكلمت عن غالبية أشكال الارتباط، ووصفت الشكل اللي فوق دا بإنه ارتباط غير آمن للطفل insecure attachment، و سمى الارتباط دا disorganized attachment ( مش عارف الترجمة برضه بس organised يعني منظم مثلاً فافهمها أنت بقى )
المهم الارتباط دا ماله يعني ؟
بيقول الكاتب ان الطفل دايماً لما بيتعرض لأي ضغوطات نفسية بيلجأ بشكل طبيعي لوالديه و غالباً بتكون أمه، وفي الحالة اللي فوق دي لما الطفل اللي عنده قلق أو خوف يحاول يلجأ لأمه فيلاقيها هي كمان خايفة و قلقانه بيحصل عنده ارتباك وبيبدأ الطفل دا غصب عنه ينمي في نفسه إحساس بالمسئولية تجاه والدته دي و يحس إنه مسئول عن تخفيف قلقها دا، و بيكون في نفسه إحساس كمان إن شعوره بالقلق شيء يجب عليه اخفائه كمان…
وهنا بيتبدل الدور فياخد الطفل دور تقديم الرعاية و تاخد الأم دور اللي بيستقبل الرعاية.
و نوعية الأطفال دي بنلاقيهم موجودين دايماً… ف البنت الصغيرة أو الولد اللي تحس إنهم أم ماشية على الأرض كدا، عمال يشوف زمايله و يهتم بيهم و مش مهتم نهائي بنفسه ولا احتياجاته و موجه كل اهتمامه لغيره و لعل السلوك دا كمان مش بيدي الناس أي مؤشر أن في خطر على الطفل دا كمان، لأن الطفل دا ببساطة بينمو غير قادر على تلبية احتياجات نفسه بعد كدا لإنشغاله بدوره كأب من طفولته، و دا بيعمل عنده خلل نفسي كبير فى علاقاته بعدين يطول شرحه.
– من أهمية معرفة نوعية الارتباط دا في رأيي هو التنبيه لفكرة الثقافة عموماً اللي بنفتقر ليها قبل ما نقدم على خطوات كبيرة زي الجواز والإنجاب و إننا ببساطة بناخد خطوات زي كدا و إحنا غير مؤهلين بالمرة.
النظرية:
الـ post الأصلي على الفيسبوك:
لمعرفة أخبار الورش وأماكنها يمكنكم متابعة صفحة Superwomen stories
#حامد_أحمد#سيكل# #نظرية_الإرتباط #الأم #طفل
#Hamed_Ahmed_Hamed #cycle #attachment_theory #mother #child
No comments:
Post a Comment