سيكل: زواج الصالونات أم الزواج عن حب؟

::Photo credit goes to its owner::

Cycle: “سيكل” هي  ورش فريدة من نوعها لتبسيط علم النفس ومجال الطب النفسي وربطه بأسلوب سهل وأمثلة في حياتنا.

لمن يرغب في متابعة كل ما يتم كتابته ومناقشته، يمكنه البحث تحت مسمى باب Cycle الموجود بأسفل التدوينة

المقالة بقلم الجميلة: آية منير ..

جواز الصالونات أحلى ولا الجواز عن حب ؟ .. 

an arranged marriage or love marriage

من فترة قريت بوست لداعية شهير “أمير منير” بيقول

“لو هنسميه جواز عن حب هسمي الثاني جواز عن عقل واختيار.

ولو هنسمي الثاني جواز صالونات هسمي الأولاني جواز شوارع.”

بعيدا عن أنه مسمى صالونات مفيهوش أي إهانة للجواز بالطريقة دي .. إلا تعمد إهانة الطريقة التانية كان واضح في كلام الداعية ده بس مش ده موضوعنا ..

أنا في البداية أحب أقول أني ضد إهانة أي طريقة من دول .. أو تحميل طريقة فيهم وصمة أو عار ما ..

طيب هو فعلا جواز الصالونات أحلى ولا الجواز عن حب ..

ومين فيهم بينجح أكتر ..

طيب هو ايه تعريف كل طريقة من دول بشكل عام مش تابع لثقافة معينة ..

جواز الصالونات .. أو المرتب .. وهو فيه شخصين بيشوفوا ان صفاتهم متوافقة بشكل كبير بيبدأوا في ترتيب لقاءات كتير وبيتم اتخاذ القرار حسب رؤيتهم لنسبة التوافق بينهم ..

جواز عن حب .. هما شخصين بيمروا بمراحل الحب اللي بتجمع أي طرفين في علاقة .. Lust و Attraction و Attachment .. الشهوة والانجذاب والارتباط ..

مقال عن مراحل الحب: يرجى الضغط على الوصلة من هنـــا

على مستوى العالم فيه مؤيدين لكل نوع وأبليكيشنز كتيرة للجواز المرتب .. يعني تدخل صفاتك ويدوروا ع شخص صفاته متوافقة معاك ويعرفوكوا ببعض .. نفس الفكرة بس مش في الصالون .. ع الموبايل :D

يعني الموضوع مالوش علاقة بموروث ثقافي عندنا ولا حاجة لوحدنا .. ولا هو إهانة ولا هو تقليل من الطريقة دي ..

المشكلة الأساسية واللي بيهرب منها دلوقتي معظم الشباب هو فكرة الجواز “التقليدي” يعني ما بعد التوافق أو الحب ..

في مصر الطريقتين بيمشوا نفس الخطوات بعد قرار الارتباط الرسمي .. وكلنا بنكون في نفس السيكل بتاعت الجواز التقليدي .. وعشان كده خطوة البداية غير مسئولة أصلا عن نسب الطلاق أو فشل العلاقة أو نجاحها .. لكن الخطوات اللي بتتم بعد كده هي المسئولة فعليا عن ده ..

في الأغلب جواز الصالونات المصري بعد قرار التوافق مبياخدوش فرصتهم للتعارف بشكل حقيقي .. ولا الإندماج في دواير بعض وبتبقى العلاقة داخل إطار الصالونات طول فترة الخطوبة تقريبا .. والانشغال بتحضيرات الجواز المادية والنيش والصالون المدهب والحاجات الحلوة دي وبيتحول جواز تقليدي..

وفي الأغلب برده الجواز عن حب .. بيقع في خطأ أنهم بياخدوا قرار الجواز في مرحلة الانجذاب مش الارتباط وده للأسف بيكون فترة كل حب وقلوب ورومانسية والطرفين بيقدموا احسن ما عندهم فيها .. فبالتالي الاندماج في دواير بعض الحقيقية بيكون أقل من اللي محتاجينه عشان نقدر نحدد مدى التوافق للارتباط .. وأول ما بياخدوا الخطوة الرسمي بينشغلوا زي الصالونات في تحضيرات الجواز المادية والنيش والصالون المدهب والحاجات الحلوة دي وبيتحول جواز تقليدي ..

هو ايه طيب الجواز التقليدي ..

الجواز التقليدي في رأيي الشخصي هو اللي بيعتمد على معايير المجتمع لا معاييرنا الشخصية ..

يعني بيكون جواه مصطلحات شهيرة زي عريس وعروسة لقطة، الاتفاقات المادية أهم من الاختيار الانساني ..

الجواز في الحالة دي مبيكونش طرفين بيختاروا بعض .. لأ تقريبا الطرفين دول بيكونوا أعضاء ثانويين في الموضوع أصلا ..

“أعرف بنات عن قرب كانوا بيرفضوا عرسان لأنهم مش قادرين يدفعوا تمن الشبكة المطلوب وغيره من الأمور المادية المطروحة “

“وأعرف ولاد عن قرب كانوا بيفركشوا الخطوبة عشان قايمة ومهر ومؤخر او انه عيبة في حقه لو جاب شبكة صغيرة او متمنظرش بفرح كبير “

باختصار اللي حبيت أقوله من متابعتي لنقاش دامي هو ايه أحسن جواز الصالونات ولا عن حب ..

هو إن في مصر يا إخواني مفيش فرق بين الاتنين ..

الاتنين بيمشوا نفس الخطوات بعد خطوة البداية .. لو حابين فعلا تدوروا ع طريقة مختلفة .. امشوا خطوات مختلفة .. واكسروا تابوه الجواز التقليدي .. وهاتوا نيش لو حابين .. بس النيش ميبقاش أهم من سعادتنا ..

الـ post الأصلي على الفيسبوك:

https://www.facebook.com/aya.maneer.9/posts/568977393447535

لمعرفة أخبار الورش وأماكنها يمكنكم متابعة صفحة Superwomen stories

https://www.facebook.com/Superwomenstory/

#cycle #aya_moneer #arranged_marriage #love_marriage

#آيه_منير #الزواج_التقليدي #زواج_صالونات #حب