سيكل – تبرير العنف

::Photo credit goes to its owner::

مقالة لـ آية منير

في نقاش حول العنف ضد المرأة وهل الزوجة أو الست عموما في ايديها تسايس أو توقف في لحظة معينة عشان تمنع ده يحصل ..

استوقفتني جملة مهمة جدا وهي أن ساعات كتير ستات بتحكي أنها هي اللي بتوصل الخناقة للضرب .. وبصوت عمرو مصطفى بيرن جوة دماغي “بإعترافاتهم”

طيب خلينا نحكي شوية عن شكل “شخصية الضحية” جوة العلاقة المؤذية أو المدمرة ..

عادة الضحية مبتكونش مدركة بشكل كامل اللي هيا فيه .. وبتبحث عن مبررات لكل شئ بيحصل.

“أنا اللي استفزيته .. أنا اللي غلطت .. أنا اللي مش مطيعة .. أنا اللي مش ذكية كفاية”.

وده ما هو إلا محاولة لإيجاد مبرر هي اللي مسئولة عنه .. عشان تقدر تكمل ..

كنت قريت مقال من فترة عن أن الضحية تتحدث باسم الجاني ..

يعني أنا لو في علاقة مؤذية .. بتكلم بعقل وشخصية الجاني أو الشخص المؤذي ..

فبالتالي بشوف الشخص المؤذي من خلال نظرته هو لنفسه، وبشوف نفسي من خلال نظرته هو ليا ..

فأكيد هشوف نفسي شخص مخطئ والسبب في كل حاجة بتحصل، وهو دايما هيكون في نظري الشخص الملائكي اللي يا عيني مغلوب ع أمره وكفاية أنه مستحملني ..

المفاجأة الأكبر هو استدلال السيدات أو البنات بشهادات زي دي “أنه الستات اللي بتتضرب هي اللي بتقول بنفسها انها هي السبب” ما هي برده إلا محاولات بائسة للبحث عن مبرر لبقاءهم في علاقات على نفس النمط ..

فـ تلاقي الأسئلة الأولى على جروبات الستات أو جروبات المشاركات النفسية والخاصة لقصص العنف ..” أيه وصل الموضوع للضرب؟ .. إيه خلاه يضربك؟”، وده بيرجع لقناعات المجتمع أو البروفايل للضحية أنه لازم يكون فيه سبب ورا الأذى وهي اللي متحملاه ..

التقديرات العالمية اللي نشرت من منظمة الصحة العالمية أن واحدة من كل 3 نساء (35%) من النساء في أنحاء العالم كافة ممّن يتعرضن في حياتهن للعنف على يد شركائهن الحميمين “عنف جنسي/بدني”

ولما بحثوا عن الأسباب فكانت النسبة الأكبر هو ترسيخ الرغبة أو الاحساس الذكوري عند الجاني ..

يعني الوحش اللي بيضرب ده مش حاسس بذكوريته إلا أثناء تعنيفه للضحية سواء خلال العلاقة الجنسية أو الحياة اليومية ..

وأنا بتكلم هنا بس عن العنف البدني .. النسب غير دقيقة للعنف النفسي والعاطفي لأن حياتنا اليومية في مجتمع زي مصر مثلا بنمارس كلنا عنف نفسي على بعض وعايشين آخر حلاوة ..

الخلاصة أن الشخص العنيف أو اللي عنده استعداد يضرب شريكه مش مستني سبب يخليه ياخد خطوة زي دي.. هو ماشي محمل بالصفة في كل لحظة وفكره متشبع بقدرته على تعنيف الآخر .. أي عوامل خارجية تساعد على تحفيز هذه الصفة تكاد تكون صفر .. لأنها صفة محفزة في الاساس والمجتمع مديها غطاء ديني ومجتمعي عظيم .. “بيقوم سلوكها أو بيربيها أو غيره”

من فضلكم .. 5 ثواني فقط قبل صاروخ التبريرات للعنف بشكل عام .. 5 ثواني بس نفتكر أن مش من حق أي حد لا يهدد ولا يضرب أي حد تاني ..

ومن حقك تحمي نفسك بكل السبل .. سواء بالانفصال أو بالقانون أو بالدفاع عن النفس ..

احنا كلنا على الأرض دي سواسية .. محدش اتخلق واصي ع حد ولا أعلى من حد .. ودي للأسف حقيقة غايبة عن نسبة كبيرة من مجتمع زي مصر ..

مش من حق حد يمد ايده عليك ..

#cycle #aya_moneer #sexual_abuse #abuse #women #physical_abuse 

#سيكل #آية_منير #”عنف_جنسي #عنف_بدني #إمرأة #مجتمع #عنف

الـ post الأصلي على الفيسبوك:

https://www.facebook.com/aya.maneer.9/posts/557324381279503

لمعرفة أخبار الورش وأماكنها يمكنكم متابعة صفحة Superwomen stories

https://www.facebook.com/Superwomenstory/