::Photo credit goes to its owner::
بهذا المقال الرائع سأبدأ بتجميع وأرشفة كل ما يقدمه “حامد أحمد” و “آية منير” في ورش Cycle، والتي يقومون بنشرها بشكل دوري على الفيسبوك وهذا لكي يسهل الوصول لها في أي وقت…. وسيتم إضافة اسم صاحب المقال بالأسفل في كل مرة.
في البداية سأعرفكم على Cycle: “سيكل” هي ورش فريدة من نوعها لتبسيط علم النفس ومجال الطب النفسي وربطه بأسلوب سهل وأمثلة في حياتنا.
هذه المرة سيُحدثنا “حامد” عن self harm أو إيذاء النفس
– أكبر أزمة بتواجه علاج الأمراض النفسية – بشكل عام – هي معرفة المريض أن اللي بيعاني منه دا مرض نفسي و بعدها يقتنع أنه المفروض يطلب المساعده النفسية بصورة صحيحة.
إحصائية اتعملت من national institute of mental health أن الشخص العادي بيفضل في المتوسط 10 سنين يعاني من الأمراض النفسية لحد ما يطلب المساعدة .
بالإضافة لكدا هنلاقي أن من العوائق الأسياسية كمان اللي بتمنع وصول المريض للمساعدة النفسية هي الوصمة المجتمعية الملصقة بالمرض النفسي، و الجهل العام بصورة الامراض النفسية في المجتمع، و دا اللي هقول عليه حاجة.
– أيذاء النفس self harm أو cutting هو من أكتر الحاجات اللي عندنا تجاهها عدم تفهم كبير.
أولاً تعريف الـ self harm هو : إنها أفعال متعمدة و إرادية من إيذاء الجسم عن طريق التقطيع بآلة حادة cutting أو الحرق burning أو أي شيء آخر يجلب الألم و ليس الغرض منها الانتحار .
بمعنى أن الشخص اللي بيكرر أفعال الـ cutting دي يا ريت منشغلش مخنا معاه و نقوله أنت مش بتموت نفسك ليه ؟ . هو مش عاوز يموت نفسه أساساً.
من المشاكل الكبيرة اللي بتواجه الناس دي إتهامهم بأنهم عاوزين يلفتوا ليهم الانتباه و أنهم مجرد attention whore و دا في رأيي أصل المشكلة .
الـ self harm بيبقى غالباً نتيجة لمرض نفسي تاني زي الاكتئاب depression أو مرض القلق anxiety أو أمراض تانية بس دول أكبر سببين.
و لأن الآلام النفسية هي آلام داخلية الشخص العادي متعودش يتعامل معاها أو يحلها، على عكس الآلام الخارجية زي أنه يتجرح بسكينه مثلاً، فهو بيكون عارف أنه المفروض يضغط على الجرح و يحط عليه قطنه لحد ما يهدى.
ولأن المريض النفسي – غالباً – معندوش القدرة على أنه يتحكم في و يسيطر على آلامه الداخلية بينقل الألم الداخلي بتاعه لألم خارجي محسوس في محاولة منه للسيطرة على ألمه الداخلي بالألم الخارجي اللي صنعه هو بايده .
و من أشهر الحاجات اللي بنكرر فيه السيناريو تحويل توترنا الداخلي لرد فعل محسوس بيكون في التدخين.
هتلاقي أن أغلب المدخنين بيتلذذوا جداً إنهم يشوفوا الدخان طالع منهم للهوا و بيشوفوا أن دا بيخفف من آلامهم أو توترهم، لأنهم بيحاولوا يطردوا توترهم الداخلي في صورة الدخان اللي بيطردوه في الهوا، بيجسم الألم الغير ملموس بصورة ملموسة في محاولة للتخلص منه.
الـ self harm هو محاولة للنجاة مش محاولة للانتحار، و الشخص اللي بيمارس الفعل دا مع نفسه هو مش شخص سيء لأنه بيطلب الاهتمام و الانتباه، هو شخص حاول يلفت الانتباه لمعاناته بكل الصور لحد ما اضطر أنه يظهرها بالصورة دي .
– ضيف للحاجات اللي فوق دي أسباب تانية كتير بتخلي الشخص يلجأ للـ self harm زي انه بيحاول يفرح أو يعالج نفسه لأن الجروح أو الألم بتطلع مادة مخدرة endorphin، دي ممكن نلاحظه جداً في الناس اللي مدمنين على رسم التاتو مثلاً ، لأن الآلة بتاعت التاتو و هو بتخرم جلدهم بتخلي الجسم يطلع المادة دي .
و ضيف لدا كمان الناس اللي اتعرضت لإيذاء جنسي sexual abuse زي الاغتصاب او التحرش أو الناس اللي اتعرضت لإيذاء بدني physical abuse زي الضرب المبرح و هما صغيرين مثلاً.
الناس دي غالباً بتكبر عندهم مشكلة كبيرة مع جسمهم اللي ممكن يكبروا و هما بيكرهوه لأنهم بيكرهوا التجربة اللي مروا بيها فيعرضوه للأذى المستمر، و دا بيظهر في شكل علاقات جنسية متكررة ، أو عادة سرية masturbation بصورة مؤذية و غير صحيه أو ببساطة يهمل في صحته بشكل متعمد و مقصود بهدف إيذاء جسمه .
و سبب كمان بيشجع الشخص على إيذاء نفسه هو الإحساس بالخواء و البرود العاطفي numbness يعني مش حاسس بشيء نهائي ، لا بنفسه و لا اللي حواليه فبيضطر يعور نفسه عشان يثبت لنفسه بالألم إنه موجود.
– مش هدخل ف تفاصيل إزاي ممكن نتعامل مع الناس اللي بتمارس الـ self harm و لكن هقول نصيحة عامة.
و هو يا ريت الناس لا تصدر أحكام على معاناة غيرها زي انه مثلاً بيحاول يلفت الانتباه و خلاص أو أنه عاوز يتشهر بس، لأن كل شخص له قصته و معاناته اللي هو أعلم بيها، و لأن البيئة بتكون صحية أكتر كل ما كانت الأحكام judgments اللي بيوجهها أفرادها لبعضهم أقل.
إحنا ممكن نتدخل بالعلاج أو المساعدة أو نطلب المساعدة – و دا أحسن – بدون الخوض في أحكام بتزود معاناة الناس و مش بتساعد نهائياً على شفائهم .
الـ post الأصلي على الفيسبوك:
لمعرفة أخبار الورش وأماكنها يمكنكم متابعة صفحة Superwomen stories
#cycle
#hamed_ahmed_hamed
#self harm
#cutting
#depression
#إيذاء_النفس
No comments:
Post a Comment