عن الخوف من ليلة الزفاف

::Photo credit goes to its owner::

مقالة لـ آية منير

 الخوف من ليلة الزفاف ..#سنة_أولى_جواز

 لما حاولنا نسأل مجموعة بنات مقبلة على الزواج .. ايه اللي خايفة منه في ليلة الزفاف ..

كانت معظم الردود محصورة في:

– هل الجنس مؤلم ؟

– هل جوزي هيتعامل معايا بحساسية وتفهم أنه شئ جديد بالنسبة ليا .. ؟

– المعلومات اللي انا عارفاها كانت سليمة ولا لا ..؟

– أنا سمعت تجارب وحشة أوي من صحابي ..  

– انا معرفش كتير عن الجنس ..

– هل هكون سعيدة.. ؟  

وبعد دراسات كتير بدأوا يحددوا أهم أسباب أدت للأسئلة دي جوا كل بنت مقدمة على تجربة الزواج لأول مرة وكانت كالآتي :

– احساس بعدم الرضا عن جمالهم .. والصورة السلبية عنه اللي اتراكمت بسبب علاقات سيئة او أسلوب تربية خاطئ والخوف من رد فعل جوزها بعد أول مرة يشوفها.

– الجهل بكل الأمور الجنسية ..

– ارتباط القبول الجنسي لها بتجارب سيئة ..

– وجود ضغوط كبيرة على البنت أنها لازم تظهر انها مش عارفة أي حاجة ولا عندها أي خلفية جنسية لإثبات احترامها ..لما اتكلمنا عن صورة الجسم الايجابية في ورشة بينك.. كانت معظمها بيدور حول الشكل الـ perfect اللي الميديا والإعلام مصدرينه دايما في إعلانتهم، ولكن مهم تُدركي أن الصورة دي مزيفة وغير حقيقية.

سوبر وومن دورت على مجموعة حاجات ممكن تساعدك تواجهي مخاوفك من ليلة الزفاف..

أولها مقال مهم ولطيف قدرنا نلخصه ليكي بيتكلم عن 5 طرق بسيطة وسهلة هتقدري تضيعي كل الخوف ده وتقضي ليلة سعيدة مع شريك حياتك ..

1. اعرفي أكتر عن الجنس ..

وسط تجاهل الأهالي والمدارس وكل الجهات اللي المفروض تكون مسئولة عن تعليم أولادنا أكتر عن الجنس من سن مناسب .. وبدلا من الخبرات السيئة والنصائح الغير صحية اللي بتتناقل بين الشباب والبنات .. أخرجي أنتي برة الدايرة دي واقري واسمعي أكتر بشكل علمي ومبسط عن الجنس وأعرفي أكتر إيه هو وأعرفي أكتر عن جهازك التناسلي ووظيفة كل عضو فيه، كمان اعرفي أكتر عن الـ orgasm والمتعة الجنسية .. مهم تعرفي كمان عن حقوقك الجنسية وانك شريك في العلاقة دي .. مش مجرد متلقي أو أداة ..

المعرفة القليلة عن الجنس بتؤدي لخوف شديد من التجربة واللي في الأغلب بتُفسدها تماما وبتضيع حياتك الجنسية بين قلق وتوتر وبدون راحة بال ..

2. اتكلمي عن توقعاتك ..

ناس كتير بتفتقد التواصل مع شريك حياتهم حول حياتهم الجنسية وتوقعاتهم من كل طرف، مهم جدا تتواصلي مع شريكك في العلاقة دي وتدوروا عن أكتر حاجات مريحة ليكوا انتوا الاتنين .. وحاولي تكوني صريحة وصادقة حول رغبتك وأحلامك، وبالمثل شريكك عشان تقدروا توصلوا لعلاقة متساوية وناجحة ..

مهم جدا تعرفوا أنكوا شخصين طبيعين برة الأفلام السينمائية والرومانسية المطلقة اللي موجودة حوالينا طول الوقت، وكمان تتأكدوا أنها رحلة بدايتها من أول يوم في جوازكوا حاولوا تكون بداية سعيدة للطرفين.

3. التصالح مع الماضي ..

التجارب السيئة عموما اللي اتسببت في صورتك السيئة عن نفسك .. سواء كانت حب أو علاقتك بأهلك أو غيره، هي تجارب وعدت مش هي المرجع اللي المفروض تستمدي منه خبرتك في علاقتك بجوزك، حاولي تتصالحي مع الماضي وتدوري على حلول لأثاره ولو محتاجة مساعدة من متخصص متتردديش ..

4. متضغطيش نفسك 

هي مش مسابقة ، ومهم تعرفي أنك مش مطلوب منك إرضاء الطرف التاني ، أنتوا الاتنين شريكين في العلاقة دي وكل المطلوب انك تكوني على طبيعتك ومرتاحة ومش مضغوطة، ومتقلقيش من قبول الطرف التاني لشكلك أو جسمك، لأن قبولك لنفسك ده الأهم، اهتمي بنفسك زي ما تحبي وتقبليها .. واطمني وارتاحي ومتقلقيش ..

ومن أحد أهم اسباب الضغط على البنات في ليلة الزفاف المعتقدات الخاطئة عن الرغبة الجنسية عند الرجل ومحاولة اصطناع جو مش حقيقي بينهم، حاولي تبعدي عن كل الخبرات والأفكار والمعتقدات دي واستمتعي انتي وشريكك زي ما انتوا حابيين ..

5. مشاعر ورومانسية.

علاقتكوا الجنسية هي انعكاس لمشاعركوا وحبكوا .. مهم يكون بينكوا مشاعر وتمهيد للحظة دي، توقعوا الجو الرومانسي واصنعوه .. حبكوا لبعض وقبولكوا لمشاعر بعض هينقلكوا ببساطة لجنس سعيد من غير مجهود كبير…….دي كانت شوية حاجات مهمة لازم تعرفيها قبل يوم فرحك ..

كمان تقدري تشوفي الفيديو ده من هنـــا  بيتكلم فيه عن اعتقاد البنات عن سعادتهم الجنسية..

ولو حابة تعرفي أكتر عن إيه هي الأورجازم وإزاي تقدري توصلي ليها من خلال علاقتك الجنسية مع شريك حياتك ده فيديو مهم جدا، من هنـــــا 

نتمنى ليكي ليلة زفاف سعيدة وحياة زوجية مليئة بالحب (^0^)

#cycle #aya_moneer #pink 

#سيكل #آية_منير #بينك #ليلة_الزفاف #سنة_اولى_زواج #خوف #جنس 

الـ post الأصلي على الفيسبوك من هنـــا

لمعرفة أخبار الورش وأماكنها يمكنكم متابعة صفحة Superwomen stories من هنـــا