::Photo credit goes to its owner::
مقالة لـ آيـة منيــر
من يومين في بنت كلمتني أنا حقيقي بشوفها جميلة وملامحها بريئة جدا ..
وقالتلي بالحرف كده : أنا بكره شكلي..
وفضلت تعدد عيوب شكلها من حيث الوزن ونوع البشرة وغيره ..
ولما سألتها طيب إيه حصل خلاكي تنفعلي وتيجي تتكلمي معايا ..
قالتلي أنا عمري ما ارتبطت ولا أتحبيت .. الباب ده مقفول تماما ..
وآخر حاجة كنت بتكلم مع واحدة صاحبتي في الموضوع وبسألها تفتكري ليه أنا عمر ما ولد أعجب بيا .. قالتلي أنتي مستوى جمالك قليل بالنسبة للمتاح قدامهم ..
أنا حقيقي اتفاجئت من وقاحة صياغة الجملة .. بس سمعت البنت لنهاية الكلام .. وابتديت أتكلم بعدها الكلام المعتاد بتاع أنتي جميلة وحاولي تشوفي مواطن جمالك وتميزك وإلخ ..
بس بعد ما قفلت معاها .. سألت نفسي سؤال ..
وهي لما تشوف نفسها جميلة ده هيكون كافي أنها تتعامل وسط مجتمع بالشكل ده؟.
طب وإيه الحل ..
مش فاكرة تحديدًا مين اللي كان قالي الجملة دي بس هو كان بيوصف بنت بأنها مجتمعيا بتصنف “غير جميلة” وإزاي ده شئ بائس وقاسي جدا وازاي البنات دي بتواجه حياتها بدون قبول مجتمعي ..
القبول المجتمعي شئ مزعج لأن مقاييس مجتمعنا عالية وعلى الفاضي ..
يعني بداية من شكل عيلتك وشكلك انت شخصيا ونوع تعليمك واسم كليتك وطريقة لبسك واسلوب حياتك .. كلها مقاييس مش متناسبة مع المستوى الحقيقي لمجتمع نسبة الممارسة الرجعية فيه عالية ..
وخاصة وسط المجتمع الأكثر قهرًا وهو المجتمعي النسائي واللي بيمارس القهر اللي بيشوفه برة على بعضه ..
بدون تعميم لكن المجتمعات المقهورة بتكون مليانة عفن وجهل وامراض خبيثة وسيئة .. وكوني أنثى فا أنا أوقات كتير بحس بالاستياء من التجمعات النسائية لأنها بتبروز شكل القهر اللي الستات دي عايشاه ..
مثال بسيط ..
ست بترفض حياة بائسة مع زوج ظالم وبتنفصل عنه .. مستحيل .. وأنا بقولها مستحيل تقعد وسط جلسة نسائية إلا ما هتسمع جملة لوم وتقطيم وتقليل من شأنها ..
أنا فكرت في كل ده بعد ما البنت دي كلمتني .. واستأذنتها اكتب البوست ده ..
الحل مش بس أنك تشوفي نفسك جميلة .. الحل كمان أنك تشوفي حقيقة مجتمعك .. وترفضيه .. ومتنتظريش منه قبول ..
الحل مش أنك تشوفي نفسك حرة بس .. لا أنك تشوفي قد ايه اللي حواليكي يعادون الحرية وبيكرهوها .. عشان تقدري تحسي بقيمة ما تملكين ..
واخيرا ..
داخل كل انسان فيه أبواب نور .. طاقات من الحب والجمال .. قادر أي قهر أنه يقفلها ويختذلها في أشياء مادية غير مفهومة بالنسبة ليا ..
أنا أسفة على كل نقطة نور انطفت جوه انسان بسبب اللي حوالينا ..
#cycle #aya_moneer
#سيكل #آية_منير
الـ post الأصلي على الفيسبوك:
لمعرفة أخبار الورش وأماكنها يمكنكم متابعة صفحة Superwomen stories
No comments:
Post a Comment