::Photo credit goes to its owner::
مقالة لـ آية منير
في ناس كتير متعرفش أن فيلم “ألف مبروك” بتاع أحمد حلمي متاخد من فيلم أجنبي اسمه groundhog day أعتقد مش متأكدة يعني ..
الفيلم أن يوم “أحمد حلمي” بيتكرر وتصرفاته هي اللي بتتغير ناحية نفس المواقف والأشخاص، لحد ما هيقدر يكتشف حقيقة واقعه ويواجهها ..
بس هو مأخوذ كمان عن أسطورة سيزيف او سيزيفوس الإغريقية (Sisyphus)
بتحكي الأسطورة الإغريقية دي أن سيزيف كان رجل ذكي ووصفه كُتاب كتير أنه أمكر من أوجدته البشرية، قدر أنه يخدع إله الموت نفسه “ثانتوس” و طلب منه أن يجرب الأقفال، وأول ما جربها إله الموت قام سيزيف بتكبيله، ولما كبل سيزيف إله الموت منع الناس أنها تموت، وطبعا ده أغضب الآلهة وأصدروا عليها حكم أنه يعيش حياة أبدية في عمل تافه جدا وهو دحرجة صخرة ويطلعها لقمة الجبل وترجع تقع تاني ويرجع يرفعها بلا نهاية ،وبكده يكون عقابه أنه يعيش حياة أبدية بلا معنى أو عمل مفيد ..
حقيقي وأنا بدور على الأسطورة دي قلبي اتقبض جدا من الروتين اليومي اللي بنعيش فيه يوميا بلا أي جدوى والدواير اللي بنجري فيها يوميا ..
نصحى ناكل ونشرب ونشتغل ونشوف نفس الناس وننام وهكذا .. ولما دورت لقيت كذا تحليل للأسطورة رائع وجميل وحبيت أشاركم بجزء من اللي لقيته ..
*ألا يمثل الموت في هذه الحالة خلاصًا للإنسان من هذا الضجر السرمدي؟*
في الحقيقة قريت كذا حاجة بتتكلم عن الفلسفة الوجودية ولقيت من أكثر الكتابات الرائعة لفليسوف “كامو” وكلامه معظمه حوالين قضية المعنى والانسان في الحياة ..
“كامو” شاف أنه عبثية العالم راجعة لعدم خضوعه للعقلانية، وفي وجود فجوة بين الواقع ووعي الانسان، وعدم وجود إجابات لتساؤلات العقل وأن كل تساؤل بيسلم لتساؤل تاني، “إحنا عايشين ليه؟ وبنعمل إيه؟ وإيه الهدف؟ وفين الجنة وفين النار؟ وفين الثواب وفين العقاب؟
وتفضل الدواير تكبر وتتحول الحياة سخيفة وعبثية لأننا مش راضين عن اللي فهمناه ..
يرى “كامو” في تفسيره لأسطورة سيزيف أنها لا تعكس مأساة الإنسان في عبثية الحياة بقدر ما تصور تحديه وكفاحه المستمر، سيزيف كان يقدر أن يضع حدا لحياته وأن ينهي هذا العقاب الأبدي. لكنه اختار بشجاعة أن يتحدى قدره ويكمل في مواجهة مصيره
في النهاية اللي ممكن تفهمه من أسطورة سيزيف أنه مش بالضرورة أن يوصل الإنسان إلى هدف في حياته وأن يحقق انجازات من نوع ما، * وأن هدف الحياة الأسمى تجدها في ذاتها، لا يقع المعنى في مكان خارج السعي والكفاح ده ومواجهة الإنسان لمصيره وقدره، وهو يكافح ويناضل ويتمرد يصنع نفسه ووعيه وقدره الخاص.*
يكمن معنى الحياة في إعطاء القيمة لكل مانصنعنه فيها من مواقف وأعمال مهما كانت صغيرة ومتواضعة، وفي شعورنا بأن مشوار حياتنا هو الهدف بعينه، ولكن هو اللي بيزودنا فعلا بالقدرة على البقاء والاستمرار ودحرجة صرختنا اليومية.
#cycle #aya_moneer #sisyphus
#سيكل #آية_منير #أسطورة_سيزيف
الـ post الأصلي على الفيسبوك:
لمعرفة أخبار الورش وأماكنها يمكنكم متابعة صفحة Superwomen stories
No comments:
Post a Comment